اسلام آباد۔ 19 نومبر (اے پی پی) اسپیکر قومی اسمبلی اسد قیصر پارینے کہ پاکستان و مصر انا تین پہ تینی تعلقداری مذہب، اخوت، دودوربیدگ و تاریخ نا سوگو بنداوتیاٹی ءِ، پاکستان پارلیمانی و اقتصادی رابطہ غاتا مون آ دننگ نا کمک اٹ ہڑتوم آ کنڈآتا تعلقداری تے سوگو کننگ نا خواہندار ءِ، پارلیمانی سفارتکاری ہڑتوم آ اسلامی برادر ملک آتا نیام اٹ تین پہ تینی تعلقداری ءِ مون آ دننگ اٹ اہم کڑد ادا کننگ کیرہ،م ہڑتوم آ ملک آتا پارلیمنٹ نا باسک آک ہڑتوم آ قوم تے خڑک اتنگ اٹ اہم ءُ کڑد اس ادا کننگ کیرہ۔ داخیال آتا درشانی ءِ او پاکستان اٹی تعینات مصر انا سفیر طارق محمود دہروگ تون گپ وتران کرسا کرے، ہراپنچ شنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری، مسلم ملک آتیٹی خڑکی رابطہ و تین پہ تینی است خواہی نا ایلو باندات آتیا گپ وتران کریر۔ اسپیکر قومی اسمبلی پارے کہ پاکستان و مصر انا نیام اٹ تعلقداری مذہب، اخوت، دودوربیدگ و تاریخ نا سوگو بنداو تیا استوار ءِ۔ پاکستان پارلیمانی و اقتصادی رابطہ غاتا مون آ دننگ نا کمک اٹ ہڑتوم آ کنڈآتا تعلقداری تے سوگو کننگ ناخواہندار ءِ۔ پارلیمانی سفارتکاری ہڑتوم آ اسلامی برادر ملک آتا نیام اٹ تین پہ تینی تعلقداری ءِ مون آ دننگ اٹ اہم ءُ کڑد اس ادا کننگ کیرہ۔ اوپارے کہ ہڑتوم آ ملک آتا پارلیمنٹ نا باسک آک ہڑتوم آقوم تے خڑک اتنگ اٹ اہم ءُ کڑد اس ادا کننگ کیرہ۔ پاکستان و مصر اہم علاقائی و جہانی باندات آ اسہ وڑ موقف تخرہ۔ پاکستان مصر اتون زرگزرانی، اقتصادی و علاقائی شونداری کن کمکاری ءِ پین مون آ دننگ خواہک، اسپیکر قومی اسمبلی پارے کہ ہڑتوم آ ملک آتیٹی واپار نا کچ اٹ ودکی نا بھلو وارخواہی اس ارے۔ ہڑتوم آ ایلم اسلامی ملک آتیٹی خڑکی اقتصادی کمکاری ہڑتوم آ قوم تا گچین فائدہ ٹی ءِ۔ اتحاد بین المسلمین امہ ءِ مون تروک ویل آتا ایسری کن المی ءِ۔ اوپارے کہ دیکی ٹی اسلاموفوبیا نا ودوک آ رجحان جہانی امن کن گڑتی اسے۔ اسلامو فوبیا نا چٹفنگ کن اسلامی ملک آتے اوسہ اسیجائی لائحہ عملی اس تینا کننگ نا گرج ءِ۔ فرانس اٹی گستاخانہ خاکہ غاتا اشاعت آن مچ آ اسلامی دنیا نا جوزہ غاک مجروح مسنو۔ اوپارے کہ دنیا ٹی پائیدار امن کن بین المذاہب ہم آہنگی نا مون آ دننگ کن مذہبی اسکالر آتا نیام اٹ ہیت وگپ المی ءِ۔ اسپیکر قومی اسمبلی الازھر یونیورسٹی مصر انا صدر ڈاکٹر محمد حسین ءِ ہم دورہ پاکستان نا سلہ خلک۔ داوخت آ مصری سفیر طارق محمود دوروگ پارے کہ مصر پاکستان تون تینا خڑکی سنگتی تعلقداری تے بھاز قدر انا نظر اٹ ہرک و اوفتے پین ودفنگ نا خواہندار ءِ۔ ڈیہہ ٹی امن کن پاکستان نا کوشست آک ستاکڑزرہ۔ اوپارے کہ مصر پاکستان تون اقتصادی و واپاری بشخ آتیٹی کمکاری ءِ مون آ دننگ نا خواہندار ءِ۔ ہڑتوم آ ملک آتا نیام اٹ واپار نا گچین وارخواہی دوئی ءِ ہرافتیان فائدہ ہرفنگ مریک۔ ہڑتوم آ برادر ملک آک قدیم دودوربیدہ ئی میرات نا خواجہ ءُ ہڑتوم آ ملک آک سیل و سوات ءِ مون آ دننگ کن خڑکی رابطہ غاتا مننگ المی ءِ۔ طارق محمود دہروگ پارے کہ ہڑتوم آ ملک آک پارلیمنٹ نا باسک آک ہڑتوم آ کنڈآتا تعلقداری تے سوگو کننگ اٹ اہم ءُ کڑد اس ادا کننگ کیرہ۔ اسلامو فوبیا نا توننگ کن دیکی ٹی اسلامی تعلیمات نا اشاعت المی ءِ۔ پوسکن آ ٹیکنالوجی نا کاریم اٹ اتنگ نا کمک اٹ دنیا ٹی اسلام نا حقی و پرامن تشخص ءِ تالان کننگ مریک۔ اوپارے کہ اسلامو فوبیا نا چٹفنگ کن مذہبی اسکالر، مشائخ و عالم دین تا کڑد کلیدی اہمیت تخک۔ کورونا دین انا جہانی دین انا تالانی ءِ توننگ کن جہانی کہول آ اسیجائی لائحہ عمل اس تینا کننگ نا گرج ءِ۔
