فیصل آباد۔ 18 نومبر (اے پی پی) وزیراعظم عمران خان پارینے کہ ننے ہندن ءُ پاکستان اس میرات اٹی رسینگانے ہرا وام تیٹی ڈبینگوک ئس، وام ہلسا زرمبادلہ نا کوڑی تے ودفیر وخڑچ کرسا کاریم ءِ چلیفنگا، داوڑاٹ ملک امر شون ہلککہ، ساڑی حکومت ملک اٹی صنعتی سرجزآتے مون آ دننگ ءِ، اللہ نا شکر ءِ کہ داوخت آ پاکستان نا ٹک آک مثبت ءُ، تعمیراتی صنعت چلینگ نا بناءِ کرینے، داڑتون گنڈوک صںعت آک ہم چلینگرہ، داڑکن ہم نن پیکج تسونن، صنعتی عمل نا شونداری کن غٹ تعلقدار کڑدہ غاتون سلابت کینہ، کورونا دین انا ارٹ میکو لہر گڑتی نا سوب ءِ، ننے خیالداری اٹ کاریم ہلوئی مریک تانکہ ننا کاروباری سرجزآک برجاسلر و نیزگاری ودپ، خوانخواستہ کورونا نا حالیت آک بگڑینگار تو زرگزران ہم زہمی مریک، ہرڈویژن اٹی ہائی کورٹ مرے، ہندی حکومت آتا ہندن ءُ نظام اس اتنگ اُن ہراڑآن الس ءِ آسراتی ملک۔ داخیال آتا درشانی ءِ او چارشنبے نادے آ فیصل آباد نا برآمد کنندگان و پوریاگر برادری نا دود آن تران کرسا کرے۔ وزیراعظم پارے کہ داڑے ہائی کورٹ نا ہیت ءِ کننگانے، داہیت آن متفق اُٹ کہ ہر ڈویژن اٹی ہائی کورٹ مرے، حکومت نا بنداوی زمواری ءِ کہ او الس کن آسراتی ودی کے تانکہ مخلوق ءِ اوفتا درگہ غا آسراتی دوبننگ کے۔ پوسکن آ بلدیاتی نظام ملک انا تاریخ نا غٹ آن گچین نظام مریک۔ شونداری فنڈ آتیان شار سہی مننگ کپک، لندن، نیویارک، پیرس و تہران تون اوار غٹ دنیا نا شار تا تہہ ٹی گچین مروک میئر نا نظام مریک، دانا مچ ءُ کابینہ اس مریک، اوفتا غٹ ویل آک ہمو شارتیٹی ایسر مریرہ۔ اوپارے کہ ہر شار انا تینا گچین کاری مریک، میئر براہ راست گچین مریک۔ مہالو یونین کونسل آتا کمک اٹ گیچن کاری مسکہ،اوٹی پیسہ چلینگاکہ، او سسٹم بے سہب مسنے۔ اوپارے کہ اسہ وخت اس بریک کہ مانچسٹر والاک ہم پارہ کہ فیصل آباد ننے آن مون آ پیش تمانے۔ اوپارے کہ 2018ء ٹی ننے ہرا پاکستان ملا اوڑآ تہہ و پیشن نا ہنداخہ وام ئس و داخہ نسخان ئس ہرا ننا تاریخ اٹی متنے۔ کرنٹ اکاؤنٹ نسخان 20 ارب ڈالر ئس۔ ہراوخت اسکان داخہ نسخان مرے او ملک انا درجہ بندی ٹی گچینی بفک و کرنسی آ دباؤ مریک۔ کرنسی نا تمنگ آن کبینی ودک۔ اوپارے کہ کبینی نا غٹ آن بھلا سوب دادے کہ واپاری نسخان 40 ارب ڈالر ئس۔ داخہ در نسخان مرے تو کرنسی نا نہاد ءِ تو کم مروئی ءِ ۔ وام ہلسا زرمبادلہ نا کوڑی تے ودفنگے و ولدا اوفتے خڑچ کرسا کاریم ءِ چلیفنگے تو امر ملک شون ہلیک۔ نن ہراتم حکومت اٹ بسن تو ملک مشکل حالیت آتیٹی ئس و سخت زرگزرانی چیلنج مون تروک ئس و زرگزران دباؤٹی ئس، نن بھلو مشکل ءُ وخت اسے آن گدرینگانن۔ درملکی سنگت آک ننا ہمووخت آ کمک ءِ کریر ہرانا سوب آن نن خواتہ مننگ آن بچان۔ اللہ تعالیٰ نے مشکل وخت آن کشا۔ 60 انا دہائی ٹی پاکستان نا شونداری نا دنیا ٹی درور تننگاکہ، سویلی کوریا کون آ ملک آک ننا شونداری پلان آ عمل کرسا مون آ ہنانو۔ ننا ادارہ غاک ہم سوگو ئسر۔ ننا یونیورسٹی تے مچ آ دنیا ٹی امنا کننگاکہ۔ پاکستان نا اسہ ہند اس ئس۔ ہمووخت آ پاکستان نا انڈسٹری ہم شون ہلکرہ، ننا پرائیویٹ بینک ہم ئسر ولے ہراتم 70ء نا دہائی ٹی ذوالفقار علی بھٹو گچین مرسا بس و او نیشنلائزیشن نا عمل نا بناءِ کرے تو اوڑآن دا عمل سلیس، داپاننگاکہ کہ 22 خاہوت آتیٹی پاکستان نا مچ آ دولت ہنا۔
