پاکستان قطر تون تین پہ تینی کمکاری ءِ پین سوگو و ودفنگ نا خواہندار ءِ، صدر مملکت ڈاکٹر عارف علوی نا قطر ایئر فورس انا کمانڈر میجر جنرل (پائلٹ) سالم حمد النابت تون اوڑدہی ٹی گپ وتران

اسلام آباد۔ 18 نومبر (اے پی پی) صدر مملکت ڈاکٹر عارف علوی تون قطر ایئر فورس انا کمانڈر میجر جنرل (پائلٹ) سالم حمد النابت چارشنبے نادے آ داڑے اوڑدہی کرے۔ ایوان صدر نا میڈیا ونگ آن جاری بیان نا رداٹ اوڑدہی ٹی چیف آف دی ایئر اسٹاف، ایئر چیف مارشل مجاہد انور خان و پاکستان اٹ قطر انا سفیر سعودعبدالرحمان الثانی ئسک ہم ساڑی ئسر۔ صدر مملکت ڈاکٹر عارف علوی داوخت آ گپ وتران کرسا پارے کہ پاکستان و قطر انا نیام اٹ تین پہ تینی است خواہی نا غٹ بشخ آتیٹی گچین تعلقداری ءِ۔ اوپارے کہ پاکستان قطر اتون تین پہ تینی کمکاری ءِ پین سوگو و ودفنگ نا خواہندار ءِ۔ پاکستان و قطر انا نیام اٹ دفاعی و فوجی تربیت نا بشخ آتیٹی کمکاری نا بھلو لائخی اس ارے، قطر ءِ پاکستان نا دفاعی چاہنداری و ہیلکاری آسراتی تیان فائدہ ہرفنگ نا گرج ءِ۔ اوپارے کہ پاکستان نا انسداد دہشت گردی گام گیج آتیٹی عسکریت پسندی و دہشت گردی ءِ شکست مس۔ اوپارے کہ کورونادین آن پد ہم پاکستان نا زرگزران اٹ گچینی بننگ ءِ۔ صدر مملکت پارے کہ پاکستان اٹ زرکاری نا بھلو وارخواہی اس ارے و قطر چندی بشخ آتیٹی پاکستان نا زرکار دوست چاگڑد آن فائدہ ہرفنگ کیک۔ میجر جنرل سالم حمد النابت پاکستان نا سلہہ بند فوج انا کسبی چاہنداری نا ستاءِ کرے و ہڑتوم آ ملک آتا نیام اٹ دفاعی کمکاری ءِ ودفنگ نا گرج آ زور شاغا۔