ایس سی او نا سوگوی ٹی پاکستان نا بھلو کڑد اسے، شنگھائی کمکار تنظیم نا سیکرٹری جنرل ولادی میر نوروف نا چین اٹی پاکستانی سفیر معین الحق تون اوڑدہی ٹی گپ وتران

بیجنگ۔ 18 نومبر (اے پی پی) شنگھائی کمکار تنظیم نا سیکرٹری جنرل ولادیمیر نوروف پارینے کہ پاکستان ایس سی او ءِ سوگو کننگ اٹ کمک کرسا بھلو کڑد اس ادا کرینے۔ اوداہیت ءِ چین اٹی پاکستان نا سفیر معین الحق تون اوڑدہی ٹی پارے و شنگھائی کمکار تنظیم ءِ سوگو کننگ اٹ پاکستان نا کڑد و کوشست آتا ذکر ءِ کرے۔ داڑتون اوار اوار سیاسی، زرگزرانی، دودوربیدہ ئی و انسانی سنگتی نا بشخ آتیٹی تین پہ تینی کمکاری ٹی ملک انا ودوک آ است خواہی تا ہم ذکر ءِ کرے۔ داڑے جاری بیان نا رداٹ ایس سی او سیکرٹریٹ اٹ اڈ ہلوک آ دا اوڑدہی ٹی، سیکرٹری جنرل سفیر ءِ پوسکن آ عہدہ غا تقرری آ مبارکبادی تس و اونا کسبی کیریئر اٹ ہرسرسہبی کن نیک است خواہی نا درشانی ءِ کرے۔ ولادی میر نوروف روس انا کماشی ٹی ایس سی او نا سربراہان مملکت نا کونسل نا 10 نومبر کوویڈو کانفرنس آتا کمک اٹ اڈ ہلوک آ دیوان نا بھرم تیا تران کرے۔ اووزیراعظم پاکستان عمران خان نا کنڈآن نیزگاری ٹی کمتی آ ایس سی او اسپیشل ورکنگ پڑک نا ٹہیفنگ، مریس میعاد ایس سی او یوتھ اسٹریٹجی و سائنس و ٹیکنالوجی ٹی اسکالر شپ پروگرام تا شونداری کن سلاہ کروک گام گیج آتیا خاص وڑاٹ زور شاغا۔ اوڑدہی ٹی ہڑتوم آ راہشونک شنگھائی کمکار تنظیم نا کاریم نا کچ ءِ ودفسا باسک ملک آتا فائدہ غاتیٹی ہلوک آ فیصلہ غاتیا عملدرآمد کن سوگو مربوط کارروائی نا گرج آ زور شاغا۔ پاکستانی سفیر معین الحق کثیر الجہتی اصول و باسک ملک آتا فائدہ غاتے مون آ تخسا جہانی تین پہ تینی فائدہ مند کمکاری ءِ ودفنگ اٹ شنگھائی کمکار تنظیم نا کڑد انا ستاءِ کرے۔ اوواپار، زرگزرانی، دودوربیدہ ئی و انسان دوست کمکاری نا پین سوگوی کن سیکرٹری جنرل نا گام گیج آتون اوار اوار ایس سی او سیکرٹریٹ تون گچین رابطہ غاتیٹی کمکاری نا عزم انا درشانی ءِ کرے۔ اوڑدہی ٹی ہڑتوم آ راہشونک جہانی ایجنڈا نا باندات و ایس سی او نا تہہ ٹی کثیر جہتی کمکاری ءِ پین شونداری و سوگوی تننگ نا بارواٹ گپ وتران کرے۔ دا اوڑدہی ٹی ڈپٹی ہیڈ آف مشن، احمد فاروق و ایلو سینئر سفارتکار آک ہم ساڑی ئسر۔