اسلام آباد۔ 18 نومبر (اے پی پی) وزیراعظم نا خصوصی کمکار ابلاغ ڈاکٹر شہباز گل حزب اختلاف نا گلگت بلتستان نا گچین کاری تیٹی دھاندلی نا دوبہ غاتے مسترد کرسا پارینے کہ گلگت بلتستان نا الس کرپٹ اپوزیشن نا راہشون تا خورک داستان ءِ دفن کرے۔ چارشنبے نادے آ نجی ٹی وی چینل تون گپ وتران کرسا اوپارے کہ گلگت بلتستان نا گچین کاری تیٹی پاکستان تحریک انصاف نا سرسہبی وزیراعظم عمران خان نا کماشی آ الس نا پت انا درشانی ءِ و گلگت بلتستان مسلم لیگ (ن) نا راہشون تا نفرت انگیز سیاست ءِ مسترد کرینے۔ ڈاکٹر شہباز گل پارے کہ ہرافک اینو خورک نعرہ خلنگ ءُ، اوفک مستین اٹ قومی خزانہ ءِ پلاسر ہنداخاطرآن الس گچین کاری تیٹی دا وڈی خور راہشون تے مسترد کرینے۔ اوپارے کہ مسلم لیگ (ن) و پیپلزپارٹی نا کرپٹ راہشون آتون پاکستان نا شونداری و شونہالی نا ہچ ءُ ایجنڈا اس اف۔ شہباز گل پارے کہ داوخت منفی سیاست نا اف بلکن سیوت و سخا ءِ مون آ دننگ نا ءِ، اپوزیشن جماعت آک تینا نادان سلوک آ نظرثانی کیر انتئے کہ مخلوق چاہک کہ دا جماعت آک اقتدار اٹی مرسا قومی زرگزران ءِ بھس کریسر ہنداخاطرآن دا وڈی خور آک پاکستان نا شونداری ٹی اڑاند ودی کننگ نا کوشست کننگ ءُ۔ اواپوزیشن جماعت آتیا زور شاغا کہ او گچین کاری شکست ءِ امنا کپننگ نا خراب انگا روایت آن پاناد کیر و اگہ اوفتے گچین کاری نتیجہ غاتیان اعتراض اس ارے تو او اودے ثابت کیر۔ اوپارے کہ گلگت بلتستان نا غٹ گچین کاری سروے حوال آتا رداٹ پاکستان تحریک انصاف نا گچین کاری تیٹی پوزیشن نمان ئس، وزیراعظم عمران خان گلگت بلتستان اٹی غٹ آن پنی راہشون نا وڑٹ مون آ بس و پاکستان تحریک انصاف نا سرسہبی وزیراعظم عمران خان نا کماشی آ الس نا پت انا درشانی ءِ۔
