اسلام آباد۔ 18 نومبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ حکومت زرکاری نا بشخ اٹی اصلاحات و کاروبار اٹی آسراتی فراوان کننگ نا کمک اٹ پوریا گر و صنعت کار برادری نا پت ءِ مون آ دننگ کن گام گیج کننگ ءِ۔ راجی رابطہ نا ویب سائٹ ٹوئٹر آ جاری کلہو اٹی اوپارے کہ اکتوبر 2019ء ٹی ملک اٹی براہ راست درملکی زرکاری نا کچ اٹی تدوک آ مالی سال انا ہندا وخت انا مقابلہ ٹی 151 درسد ودکی مسنے۔ تدوک آ سال اکتوبر اٹی ملک اٹی 126.5 ملین ڈالر مالیت نا براہ راست درملکی زرکاری ریکارڈ کننگاسس۔ اینخو سال اکتوبر اٹی ملک اٹی 317 ملین ڈالر نا براہ راست درملکی زرکاری ریکارڈ کننگانے۔ اوپارے کہ جاری مالی سال انا اولیکو 4 تُو اٹی ملک اٹی براہ راست درملکی زرکاری نا کچ 733 ملین ڈالر ریکارڈ کننگا ہرا تدوک آ مالی سال انا ہندا مد انا مقابلہ ٹی 9.1 درسد زیات ءِ۔ ڈاکٹر عبدالحفیظ شیخ پارے کہ حکومت زرکاری نا بشخ اٹی اصلاحات و کاروبار اٹ آسراتی فراوان کننگ نا کمک اٹ پوریا گر و صنعت کار برادری نا پت ءِ مون آ دننگ کن گام گیج آتا چرجوئی ءِ برجاتخک۔ یات سلے کہ مالی سال انا اولیکو چار تُو اٹی چین پاکستان اٹی براہ راست درملکی زرکاری کروک آ بھلا ملک انا حیثیت اٹ مون آ بسنے، دا وخت اٹ چین پاکستان اٹی 332.3 ملین ڈالر و مالٹا74.1 ملین ڈالر نا براہ راست درملکی زرکاری کرینو، برجامالی سال اٹ نیدر لینڈ51.5 ملین ڈالر نا براہ راست درملکی زرکاری اتون مسٹ میکو نمبر آٹے۔ غٹ آن زیات براہ راست درملکی زرکاری بجلی نا پیداواری بشخ اٹی مس ہراڑے زرکاری نا کچ 352.3 ملین ڈالر ریکارڈ کننگا۔ فنانشنل بزنس نا پیدواری بشخ اٹی براہ راست درملکی زرکاری نا کچ 118.5 ملین ڈالر و تیل وگیس انا پیداواری بشخ اٹی 83.1 ملین ڈالر نا براہ راست درملکی زرکاری مس۔
