گلگت بلتستان الیکشن ءَ چہ کسے ءَ را شکایت اَست گڑا آ الیکشن کمیشن ءَ گوں نزیکی بہ کنت، اے وڑءَ اسلام آباد ءِ سرءَ اُرش کنگ ءِ گپ کنگ زھگی ھیال ءُ لیکہ اَنت، حال ءُ اھیوال کاری ءُ شنگکاری ءِ بنجاہی وزیر سینیٹر شبلی فراز ءِپریس کانفرنس 

اسلام آباد۔17نومبر  (اے پی پی) حال ءُ اھیوا ل کاریءُ شنگکاری ء ِ بنجاہی وزیر سینیٹر شبلی فراز ءَ گشتگ کہ  گلگت بلتستان گچین کاری ءَ چہ کسے ءَ را اگاں شکایت است آ الیکشن کمیشن ءَ گوں نزیکی بہ کنت، اے وڑءَ اسلام آباد ءِ  سرءَاُرش کنگ ء ِ گپ کنگ زھگی ھیالءُ لیکہ اَنت، بلاول بھٹو ءَ را اگاں سیاست کنگی اِنت گڈا آ وتی عملءُ سیاست ءَ پکہ بہ بیت، پی ٹی آئی اولی حکومت اِنت کہ ایشی ءِ تہ  ءَ پِتءُ پیروکی سیاست مان نیست، اپوزیشن گوست ءِ کرپشن ءَ را چیر دیئگ ءِ ھاتر ءَ کار کنگ ءَاِنت، ملک ءَ گندم ءُ شکر ءِ  کمی نیست۔ آ حزانگ ءِ صلہ کار ڈاکٹر عبدالحفیظ شیخ ءِ ہمرائی ءَ سے شمبے ءِ روچءَ مزن وزیر عمران خان ءِ سروکی ءَ  بنجاہی کابینہ ءِ دیوان ءَ پد میڈیا ءَرا  شونست دیئگ ءَ بوتگ۔ بنجاہی وزیر سینیٹر شبلی فراز ءَ گشتگ کہ معاشی اشاریے جوانیں نیمگے ءَ رؤگ ءَ اَنت، سٹاک ایکسچینج  ، درملکی زرکاری، لارج سکیل مینو فیکچرنگ ءَ ہوار دراہیں پڑآں گہتری پیداک اِنت۔ مزن وزیر ءِ کوشست اِنت کہ روزگار ءِ موہ ودی بہ بنت، ملک ءَ  وشھالی بہ ایت ءُ جاورھال گہتر بہ بنت۔  آئی ءَگشتگ کہ کوویڈ 19 ءِ دومی بھر اَتکگ مارا باز پرہیز کنگ لوٹیت۔ آئی ءَ گشتگ کہ گندم ءِ کمی ءِ شکایت نیست، 42 لکھ ٹن گندم اَست، 19 لکھ ٹن گندم  راہ ءَ اَں پیداک اَنت، ٹی سی پی ءُ حکومت ءَ گوں  گندم ءِ منءُ گر تاں فروری ءَ سرجم بنت، تاں فروری ءَ مے گورءَ گندم اَست اِنت۔ آئی ءَ  گشتگ کہ برآمد کتگیں شکر پنجاپ ءِ یوٹیلٹی سٹور آں 68 کلدار ءَ بہا بوہگ ءَ اِنت، یک جستے ءِ پسو ءَ آئی ءَ  گشتگ کہ اپوزیشن ءِ زھرشانی ءِ سیادی، جمہوری چاگرد ءَ زھر شانی کنگ بنت، معیشت گہتر ی ءِ نیمگ ءَ رہادگ اِنت، اپوزیشن ءِ کوشست اِنت کہ حکومت کار ماکنت،نامدار مہ بیت۔ آئی ءَ گشتگ کہ اے حکومت چہ درسیں حکومت آں جتاہ انت، پتءُپیروکی سیاست نیست۔ عمران خان ءِ دروشم ءَ یک انچیں سروکے اَست کہ آئی ءَ  وت ءَ را ذاتی بیپار نیست۔