اسلام آباد۔13نومبر (اے پی پی):پاکستانی دود ءُ ربیدگ ءِ دیمروئی ءُ رکھینگ ءِ واستہ لوک میلہ ءِ چیر دستی ءَ بست ءُ بند کتگیں شکرپڑیا ءَ برجم بوھوکیں 10 روچی دود ءُ ربیدگی لوک میلہ جاڑی انت ایش باندات یک شمبے ءِ بیگاہ ءَ گڈ بیت۔ میلہ ءَ ھوار پاکستان ءِ گیشتریں راج آنی دود ءُ ربیدگ وردن ءُ وراک ءُ پوشاک سمبھینگ ءُ بھا ءُ سیم کنگ بوتگ انت۔ سیل ءُ سوادی مردم آں اے میلہ ءَ را گوں دل ءِ جھلانکاں دوست ءُ واھگ داشتگ، چیا کہ ھمک پاکستانی راج ءَ ایشرا وتی راجی پجار ءُ دود ءُ ربیدگ ءِ یک مراگش ءِ شوہازتگ ءُ ایشی اندر ءَ روگ ءُ وتی دود ءُ ربیدگی وردن ءُ وراک آناں وارتگ ءُ کلچر ایونٹ آں چہ انجوامنٹ زرتگ۔ اے میلہ ءِ سر ءَ روکیں مردم بچکندان ءَ شتگ ءُ واتر آیوکیں مردم گل ءُ شاتی ءَ گوں واتر بوتگ ءُ وتی گس ءَ روان ءَ ھمے لوک میلہ ءِ اندر ءَ دیستگیں وتی وتی کوھنیں دود ءُ ربیدگی پجار ءُ استی ءِ بابت ءَ پہ پھر تران کنگ ءَ بوتگ انت۔ اے لوک میلہ ءِ ساھت ءَ پاکستانی شہری الس ءَ بگر درملکی شہری ءُ مہمان آں بھر زوری کتگ ءُ بنی آدمی زندمان ءِ گوازینگ ءِ وڑ وڑیں جوانیں سسا ساچ ءَ چہ دود ءُ ربیدگ ءِ بن زھ آناں گوں نزیک ءَ مارتگ ءُ چارتگ۔ اے میلہ ءِ ساھت ءَ ایس ءُ پیز آناں گوں مھکمی ءَ پد ءُ رند کنگ بوتگ۔ ایس ءُ پیز آنی پد ءُ رند ءِ ھاترا ٹائیگر فورس اوشتاتگ بوتگ، ٹائیگر فورس ءَ مردم آناں ایس ءُ پیز آنی نپ ءُ سیت ءِ بابت ءَ گشتانک داتگ۔ کورونا ءِ گر ءُ دار ءِ ھاترا ھاسیں بست ءُ بند اے مراگش ءِ اول سرئی کار بوتگ، مراگش ءِ اندر ءَ روگ ءَ پیسر مردم آناں چار ءُ تپاس ماسک ءِ بندگ المی کار بوتگ۔ راج ءَ اے مراگش ءَ را گوں دلے جھلانکاں گوں دوست داشتگ۔
