اقوام متحدہ۔ 17 نومبر (اے پی پی) پاکستان پارینے کہ بھارت کشمیر آ سلامتی کونسل نا قرارداد آتا پاش آن پاش خلاف ورزی ءِ کننگ نا سوب آن اقوام متحدہ نا سلامتی کونسل نا آخبتی باسک مننگ نا قابل اف، داکان بیدس بھارت سویلی ایشیائی ملک آتیٹی 20 آن زیات جنگ آتیٹی اوار مسنے و او مچ آ ڈیہہ و خاص کر پاکستان اٹی دہشت گردی و نزوری نا کمکاری ءِ کننگ ءِ اقوام متحدہ ٹی پاکستان نا آخبتی مندوب منیر اکرم اقوام متحدہ نا جنرل اسمبلی آن تران اٹی دا موقف نا درشانی ءِ کرے کہ اقوام متحدہ نا سلامتی کونسل نا باسک آتیٹی ودکی کن پوسکن آ آخبتی باسک آتیٹی بھارت ءِ اوار کننگ نا پبی مخالفت ءِ کننگک انتئے کہ بھارت 15 باسکی پوسکن آ سلاہ ئی سلامتی کونسل نا باسک مننگ نا اہلیت تخپک ہرانا بنداوی سوب مقبوضہ کشمیر آ سلامتی کونسل نا قرارداد آتا پاش آن پاش خلاف ورزی ءِ۔ اقوام متحدہ نا جنرل اسمبلی آن تران کرسا پاکستانی سفیر منیر اکرم بھارت نا پن ءِ ہلنگ آن بیدس پارے کہ برازیل، جرمنی و جاپان(جی فور) ملک آک سلامتی کونسل نا آخبتی باسک کن مہم چلیفنگ ءُ۔ اوپارے کہ بھارت سویلی ایشیائی ملک آتیٹی 20 آن زیات جنگ آتیٹی اوار مسنے و اومچ آ ڈیہہ و خاص کر پاکستان اٹی دہشت گردی و نزوری نا کمکاری ءِ کننگ ءِ۔ اوپارے کہ نن تون بھارتی ریاستی دہشت گردی نا ناقابل تردید و پیدوار شاہدی ارے۔ پاکستانی مندوب 193 باسکی جنرل اسمبلی ٹی سیکورٹی کونسل اصلاحات نا بابت گپ وتران کرسا پارے کہ سلامتی کونسل ءِ زیات جمہوری زموار و فاف کننگ نا گرج ءِ ولے داڑآ عملدرآمد اٹی تاخیر مننگءِ۔ اوپارے کہ بھارت مقبوضہ جموں و کشمیر نا بارواٹی اقوام متحدہ نا قرارداد آتا خلاف ورزی ءِ کننگ ءِ ہراڑآن کشمیری الس ءِ حق خودارادیت آن تورسا جہانی ادارہ نا قرارداد آتا رداٹ کشمیری تے تینا فیصلہ نا حق آن محروم تخنگ انگ ءِ۔ منیر اکرم مستی پارے کہ بھارت مقبوضہ کشمیر اٹی الس نا روا جہد آجوئی ءِ لتاڑنگ کن 9 لکھ آن زیات فوجی تعینات کرینے ہراہموڑے انسانی حق انا بھلا خلاف ورزی تا مرتکب ءُ۔ اوپارے کہ وادی ٹی مسلمان تا اکثریت ءِ اقلیت اٹ بدل کننگ و ریاست ءِ ہندو اکثریتی ریاست اس جوڑ کننگ کن مقبوضہ جموں و کشمیر نا پیشن آن مخلوق ءِ اتسا ہموڑے آباد کننگ انگ ءِ۔ اوپارے کہ بھارت پاکستان نا برخلاف پدریسہ جارحیت کننگ ءِ و لین آف کنٹرول آ ننا کنڈآ کودی شاری آبادی تے آرٹلری، چنکا و بھلا سلہہ غاتے اٹ شست کننگ انگ ءِ۔ اوپارے کہ بھارت کون آ ملک سلامتی کونسل نا آخبتی یا عارضی باسک مننگ نا لائخی و اہلیت تخپک۔
