اسلام آباد۔ 17 نومبر (اے پی پی) دفترخارجہ اسرائیل ءِ تسلیم کننگ کن پاکستان آ زور شاغنگ نا بابت میڈیا حوال آتے مسترد کرسا اودے دروغ و بے بنداو گوندانے۔ تدوک آ دے گڑاس میڈیا حوال آتیٹی دعویٰ کننگاسس کہ وزیراعظم پارینے کہ پاکستان آ اسرائیل ءِ تسلیم کننگ کن امریکی زور شاغنگ نا مون تروک ءِ۔ ترجمان دفترخارجہ محمد حفیظ چوہدری سے شنبے نادے آ دا چرجوئی ٹی اسہ سوج اسے نا ورندی ءِ ترسا دا حوال آتے دروغ و بے بنداو گوندسا مسترد کرے و پارے کہ وزیراعظم پاکستان نا موقف ءِ دوٹوک لوز آتیٹی پیدوار کرینن کہ فلسطین نا ویل انا ساف ایسری و فلسطینی الس کن قابل قبول حد اسکان پاکستان اسرائیل ءِ تسلیم کپک۔ وزیراعظم زور شاغسا پاریسس کہ دا چرجوئی ٹی پاکستان نا پالیسی قائد اعظم نا وژن نا رداٹ ءِ۔ ترجمان پارے کہ وزیراعظم نا بیانک دا سرحال آ پاکستان نا موقف نا پیدوار ڈیک ءِ۔ ہراڑآن بے بنداو قیاس آرائی تیکن ہچ ءُ گنجائشت اس سلپک۔ ترجمان پارے کہ منصفانہ، جامع و پائیدار امن کن، پاکستان 1967 آن مست انا سیم و القدس الشریف نا دارالحکومت نا وڑاٹ ، اقوام متحدہ، او آئی سی نا قرارداد و جہانی کانود نا رداٹ فلسطین نا دوریاستی ایسری نا مخ تفی ءِ برجاتخک۔
