اسلام آباد۔ 17 نومبر (اے پی پی) ملک اٹی براہ راست درملکی زرکاری ٹی برجامالی سال اٹی 9.1 درسد ودکی ریکارڈ کننگانے۔ اسٹیٹ بینک آف پاکستان نا کنڈآن جاری کروک حساب وکتاب نا رداٹ جولائی آن ہلیس اکتوبر 2020اسکان نا مد اٹی ملک اٹی 733.1 ملین ڈالر نا براہ راست درملکی زرکاری ریکارڈ کننگا ہرا تدوک آ مالی سال انا ہندا وخت انا مقابلہ ٹی 9.1 درسد زیات ءُ۔ تدوک آ مالی سال انا اولیکو چار تُو اٹی ملک اٹی براہ راست درملکی زرکاری نا کچ 672 ملین ڈالر ریکارڈ کننگاسس۔ مالی سال انا اولیکو چار تُو اٹی چین پاکستان اٹی براہ راست درملکی زرکاری کروک آ بھلا ملک انا حیثیت اٹ مون آ بسنے، داوخت اٹی چین پاکستان اٹی 332.3 ملین ڈالر و مالٹا74.1 ملین ڈالر نا براہ راست درملکی زرکاری کرینو۔ برجامالی سال اٹی نیدر لینڈ 51.5 ملین ڈالر نا براہ راست درملکی زرکاری اتون مسٹ میکو نمبر آٹے۔ غٹ آن زیات براہ راست درملکی زرکاری بجلی نا پیدواری بشخ اٹی مس ہراڑے زرکاری نا کچ 352.3 ملین ڈالر ریکارڈ کننگا۔ فنانشل بزنس نا پیدواری بشخ اٹی براہ راست درملکی زرکاری نا کچ 118.5 ملین ڈالر و تیل و گیس انا پیداواری بشخ اٹی 83.1 ملین ڈالر نا براہ راست درملکی زرکاری مس۔
