اسلام آباد۔16نومبر (اے پی پی): مزن وزیر عمران خان ءَ گوشت کہ راج ءَ اگاں پیسرے وڑ ءَ کورونا ءَ چہ رکھینگ ءِ رھبند وتی کت آں گڈاس مردم آنی ھواری ءَ وتی کاروبار ءُ معیشت ءَ را رکھینگ ءَ کامیات باں، اگاں ایس او پیز آنی پد ءُ رند کنگ نہ بوت گڈا جاور سک باز ھراب ءُ نہ گیگ بنت، گلگت بلتستان ءَ گچین کاری ءَ چہ پد کورونا ترندی ءَ گوں شنگ ءُ تالان بوتگ، کورونا ءِ رد ءَ ما وتی مچی ءَ را نہ کتگ ایشرا مھتل داشتگ ءُ سرجمیں ملک ءَ مچی، جاک ءُ واک آنی سر ءَ بندش بیت، فیکٹری ، دکان ءُ کاروباری بنجاھ آنی تہ ءَ کورونا ءَ چہ رکھینگ ءِ ایس او پیز آناں المی ءَ گوں پد ءُ رند کنگ بہ بیت، سکول آنی تہ ءَ کورونا ءِ جاور ھال آنی رد ءَ گیش چار ءُ تپاسی گران ءَ آیوکیں ھپتگ ءَ پیسلہ کنگ بہ بیت۔ اے ھیالانی درشانی آئی ءَ دو شمبے ءَ کورونا ءِ ھوالگ ءَ رابطہ کمیٹی ءِ دیوان ءَ چہ پد میڈیا بریفنگ ءِ ساھت ءَ کت۔ مزن وزیر ءَ گوشت کہ گیش بوھوکیں کورونا کیس آنی سر ءَ چار ءُ تپاسی گرگ بوت، سرجمیں دگنیا ءَ کورونا ءِ دومی فیز جاڑی انت، کورونا ءِ دومی فیز سرجمیں دگنیا ءَ ھوار ، ایمریکہ ، انگلینڈ ، ءُ ایندگر ملک آنی تہ ءَ کیس آنی تہ ءَ ترندی ءَ گوں گیشی بوھگ ءَ انت۔ آئی ءَ گوشت کہ کورونا ءِ ساھت ءَ پاکستان ءِ سر ءَ ھدا وند ءِ ھاسیں کرم ءُ مہربانی ءِ بوتگ، پاکستان ءِ رد ءَ بھارت ءُ ایران ءَ جاور سک باز نہ گیگ بوتگ انت، بھارت ءَ لاک ڈائون ءِ سبب ءَ معاشی جاور ھال سک باز ھراب بوتگ انت۔ آئی ءَ گوشت کہ گوستگیں 10 روچ ءِ ساھت ءَ پاکستان ءِ کورونا کیس چار درسد گیش بوتگ انت، پاکستان ءَ کورونا ءَ چہ بیرانی آنی کساس گوں ترندی ءَ گیش بوھگ ء۔ انت، بیران آنی کساس یک روچے، چار پنچ ءَ چہ گیش ودان ءَ 25 بوتگ انت۔ آئی ءَ گوشت کہ راج یک مشت بہ بیت ءُ کورونا ایس او پیز آنی سر ءَ دل یکیمی ءَ گوں پد ءُ رند پیسرے فیز ءِ وڑ ءَ بکنت، پیسرے فیز ءَ راج ءَ را جوانیں کامیاتی رستگ، آئی ءَ گوشت کہ اگاں ما ایس او پیز آنی پد ءُ رند ءَ بکن آں گڈا مردم آنی ھواری ءَ کاروبار ءُ معیشت ءَ را ھم رکھیناں۔
