لاہور۔ 16 نومبر (اے پی پی) صدر مملکت ڈاکٹر عارف علوی پارینے کہ ہر پڑاٹ سرسہبی و درکار ہدف آتا دوئی کننگ کن درکار غٹ وسیلہ و گرج آتیان پورو آگاہی مننگ المیءِ، آبادی ٹی ودکی ءِ کنٹرول کننگ و فیملی پلاننگ آ عملدرآمد نا بابت الس ءِ آگاہی فراوان کننگ کن میڈیا ءِ تینا پبی کڑد ءِ ادا کروئی مریک۔ اوداخیال آتا درشانی ءِ دوشنبے نادے آ محکمہ بہبود آبادی نا کنڈآن گورنر ہاؤس اٹی اڈ ہلوک آ اسہ دود اسے ٹی بطور مہمان خاص تران کرسا کرے۔ اوپارے کہ عالم دینک زچگی، پوسکن ودی مروک آ چناتے پاڷ کُنفنگ، فیملی پلانگن و داڑتون گنڈوک ایلو باندات آتیا الس ءِ آگاہی فراوان کننگ کن تینا کڑد ءِ ادا کیر۔ اوپارے کہ ہراوڑ میڈیا کورونا دین آن بچنگ کن آگاہی فراوان کرے، ہموڑ آبادی ٹی ودکی ءِ کنٹرول کننگ و فیملی پلاننگ آ عملدرآمد نا بابت الس ءِ آگاہی فراوان کننگ اٹ ہم میڈیا ءِ تینا پبی کڑد ءِ ادا کروئی مریک۔ صدر مملکت پارے کہ آبادی ٹی ودکی آ کنٹرول کننگ کن اسہ خاص ءُ معاملہ سے آ چکار کننگ نا جاگہ غا غٹ پلو آتے مون آ تخوئی مریک۔ داوخت آ صدر مملکت ڈاکٹر عارف علوی ءِ محکمہ بہبود آبادی نا کنڈآن کروک آ گام گیج آتا بابت حوال تننگا۔ و آبادی ٹی ودکی ءِ کنٹرول کننگ کن چندی سلاہ ہم پیش کننگا۔ گورنر پنجاب چوہدری محمد سرور، وزیراعلیٰ سردار عثمان بزدار، صوبائی وزیر بہبود آبادی محمد ہاشم ڈوگر، صوبائی وزیر جان جوڑی ڈاکٹر یاسمین راشد، وزیراعظم نا خصوصی کمکار فیصل سلطان و ایلوفک ہم داوخت آ ساڑی ئسر۔
