اسلام آباد۔ 16 نومبر (اے پی پی) بنجائی وزیر سائنس اینڈ ٹیکنالوجی چوہدری فواد حسین کامسٹیس نا چارمیکو وزارتی کہول انا سلابتی کمیٹی دیوان نا بشخ ہلوک آتیا زور شاغا نے کہ کامسیٹس نا باسک ملک آک تینا اسیجائی شونداری نا کسر اٹ بروک آ ویل آتے ایسر کننگ کن تین پہ تینی تعلقداری تے پین سوگو کیر تانکہ آخبت اٹ باسک ملک آک تینا شاری تے پین گچین طرز زند فراوان کننگ کیر۔ دا ورچوئل دیوان اٹی 19 ملک آتا 30 مندوبین بشخ ہلکر۔ ہراٹی ایران، اردن، پاکستان، سوڈان ، یمن، ترکی، بنگلہ دیش، صومالیہ، زمبابوے، چین، کولمبیا، مصر، گھانا، قازقستان، نائیجیریا، فلسطین، سری لنکا، تیونس و یوگنڈا آن تعلق تخوک آ مسہ وزیر، اسہ نائب وزیر اس و ایلو بڑزکو کہول انا سرکاری عہدیدار آک ساڑی ئسر۔ اسلام آباد اٹی کامسیٹس نا باسک ملک آتا سفیر وسفارتکار آک ہم دیوان اٹی بشخ ہلکر۔ یات سلے کہ دا اگست اٹی مروک آ اوڑدہی دیوان ئس، ہراٹی کوویڈ۔ 19 نا سوب آن تاخیر مس۔ دا آن لائن دیوان نا میزبانی ءِ کامسیٹس سیکرٹریٹ، اسلام آباد کرے۔ دیوان اٹی بشخ ہلوک آ 9 ٹکی ایجنڈا غا سجفیر۔ داوخت آ بنجائی وزیر پارے کہ پاکستان چندی ملک آتون سائنس و ٹیکنالوجی نا پڑاٹ تین پہ تینی تعلقداری و کمکاری ءِ چاگڑد ءِ قائم کرینے۔ دا پڑاٹ پین مون آ ہِننگ کن پاکستان مصنوعی ذہانت، الائیڈ ٹیکنالوجی تیٹی ریسرچ، انوویشن و انٹرپرینیور شپ اکن چندی ہند ایکسی لینس ہم جوڑ کرینے۔ داکان بیدس بائیو میڈیکل مواد کن بڑزکو درجہ نا ٹیکنالوجی، معدنی وسیلہ غاتون تعلقدار انجینئرنگ، کشت وکشار و فوڈ ٹیکنالوجی و ریلوائی انجینئرنگ آ ہم کاریم برجاءِ و دا غٹ کاریم سائنس اینڈ ٹیکنالوجی نا نالج بیسڈاکانومی گام گیج انا رداٹ پورو مریک۔ بنجائی وزیر کامسیٹس نا چیئرپرسن و کامسیٹس سیکرٹریٹ نا میزبان نا حیثیت اٹ تینا کلہو اٹی مستی پارے کہ کمیشن نا جوڑ کننگ تون پاکستان کامسیٹس نا مینڈیٹ نا پرجوش کہول آپبی کمک کریسس۔ اوپارے کہ سیکرٹریٹ نا خڑک مرسا کمیشن نا کاریم اٹی خواری و لگن نا عمل ءِ کنا وزارت خڑک آن خنانے، وزارت دا ہیت انا ہم گواہ ءِ کہ دا تنظیم بڑزکو و شیفکو کہول آ تینا مشن نا پوروی کن ہر بشخ ٹی اسہ وڑ، جہد ءِ برجاتخانے۔ بنجائی وزیر چوہدری فواد حسین تدوک آ دیوان نا فیصلہ غا عملدرآمد کننگ کن کامسیٹس نا کوشست آتا ستاءِ کرےو ایلو 26 باسک ملک آتا تینا ہم منصب وزیر آتیا زور شاغا کہ او ہر وڑاٹ ممبر شپ اٹ بشخ ہلنگ کن باقاعدگی اٹ کامسیٹس نا چندی آپریشن تا آخبتی بنداو تیا کمک ءِ کننگے۔ اوکامسیٹس نا باسک ملک آتیا زور شاغا کہ او کوویڈ۔ 19 دینی مرض انا خطرہ تون مون تننگ کن تین پہ تینی کمکاری ءِ مون آ دیر و دارداٹ تعلقدار راجی و اقتصادی چیلنج آتون مون تننگ کن اسہ ایلو نا کمک ءِ کیر۔
