اسلام آباد۔ 16 نومبر (اے پی پی) چیئرمین سینیٹ محمد صادق سنجرانی پارینے کہ پاکستان و چین نا نیام اٹ دیرینہ تعلقداری ڈیہہ نازرگزرانی و راجی شونداری کن پوسکن آ عہد اٹ پترینگانے، پاکستان چین اتون تینا فقید المثل سنگتی آ گمر کیک، پارلیمانی ڈل آتا ہن و بر آن تین پہ تینی تعلقداری تیٹی پین ودکی مسنے۔ داخیال آتا درشانی ءِ او چین نا سفیر نونگ رونگ تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی چیئرمین سینیٹ پاکستان اٹی پوسکن تعینات مروک آ چین انا سفیر کن نیک است خواہی نا درشانی ءِ کرے و پارے کہ پاکستان و چین نا نیام اٹ دیرینہ تعلقداری ڈیہہ نا زرگزرانی و راجی شونداری کن پوسکن آ عہد اٹ پترینگانے۔ پاکستان چین تون تینا فقید المثل سنگتی آ گمر کیک۔ اوپارے کہ پارلیمانی ڈل آتا ہن و بر آن تین پہ تینی تعلقداری ٹی پین ودکی مسنے۔ پارلیمانی سفارتکاری اہم ہڑتوم آ کنڈآتا رابطہ غاتے سوگو کننگ اٹ گچین کڑد ادا کیک۔ ہڑتوم آ ملک آتا نیام اٹ ادارہ جاتی کمکاری ءِ پین سوگو کننگ نا گرج ءِ۔ چیئرمین سینیٹ پارے کہ سی پیک ہڑتوم آ ملک آتا نیام اٹ تعلقداری نا سوگوی و علاقائی شونداری کن اسیجائی وژن نا بھرم ءِ۔ علاقائی شونہالی نا تغ ءِ پورو کننگ نا پبی کچ اس ساڑی ءِ۔ السی کہول آ ہڑتوم آ کنڈآتا رابطہ غاتے پین سوگوی تننگ آن دیرینہ شریداری پین سوگو مریک۔ داوخت آ چینی سفیر نونگ رونگ چیئرمین سینیٹ نا نقطہ نظر نا ستاءِ کرے و پارے کہ پاکستان چین اکن بھاز اہم ءُ ملک اسے۔ ہڑتوم آ ملک آتا شونداری و شونہالی نا وژن اسیجاءِ۔ اوپارے کہ پارلیمانی، سیاسی و اقتصادی کمکاری ءِ پین سوگوی تننگ نا گرج ءِ۔
