گلگت۔ 16 نومبر (اے پی پی) گلگت بلتستان نا گچین کاری تیٹی غٹ 23 نشست آتا غیر سرکاری نتیجہ غاک ملانو ہرافتا رداٹ تحریک انصاف 10 نشست آتون سرفہرست ءِ، وخت اس کہ پیپلزپارٹی 3 نشست آتون ارٹ میکو و (ن) لیگ اِرا نشست آتون مسٹ میکو نمبر آٹے، 7 نشست آتیا آزاد اومیتدار سرسہب مسر۔ گلگت بلتستان نا 24 آن 23 نشست آتیکن ووٹنگ نا عمل سہب انا 8 بجہ غا بناکرے ہرا شام انا 5 بجہ اسکان پرامن وڑاٹ بے سلنگ آن برجاسلیس۔ یخ موسم اٹ ہم مخلوق تینا حق رائے دہی ءِ کاریم اٹ اتنگ کن قطار اٹ سلوک نظر بسر، تحریک انصاف و آزاد اومیتدار آک میدان ءِ پلار۔ گچین کاری تیٹی غٹ 22 حلقہ غاتا غیر سرکاری و غیر حتمی نتیجہ غاک مون آ بسنو ہرافتیان 10 نشست آتیا تحریک انصاف سرسہبی دوئی کرینے۔ پیپلزپارٹی ءِ 3، مسلم لیگ (ن) ءِ 2 و ایم ڈبلیو ایم ءِ اسہ نشست اس ملا وخت اس کہ 7 آزاد اومیتدار سرسہب مسنو۔ نتیجہ غاتا بننگ آ گلگت نا چندی ہند آتیا ہوائی سم کاری و آتش بازی کننگا و گمانی سرسہب اومیتدار آتا کارندہ غاک جشن کریر۔ جی بی اے 7 سکردو آن غیر حتمی و غیر سرکاری نتیجہ غاتارداٹ گلگت بلتستان نا مسکوہی وزیراعلیٰ و پیپلزپارٹی نا اومیتدار سید مہدی علی شاہ ءِ پاکستان تحریک انصاف نا اومیتدار راجا محمد زکریا شکست تس۔ جی بی 1 گلگت نا غٹ 62 حلقہ غاتا غیر حتمی و غیرسرکاری نتیجہ غاتا رداٹ پیپلزپارٹی نا اومیتدار امجد حسین سرسہب مس۔ آزاد اومیتدار سلطان رئیس ارٹ میکو نمبر و تحریک انصاف نا جوہر علی مسٹ میکو نمبر آٹے۔ حلقہ ٹی رجسٹرڈ وونٹ آتا کچ 35992 ءِ۔ جی بی اے 2 انا غٹ 72 حلقہ غاتا غیر سرکاری، غیر حتمی نتیجہ غاتا رداٹ پاکستان تحریک انصاف نا اومیتدار فتح اللہ خان کٹا۔ پی پی پی نا جمیل احمد ارٹ میکو و دا حلقہ غان پاکستان مسلم لیگ ن نا راہشون و مسکوہی وزیر اعلیٰ گلگت بلتستان حافظ حفیظ الرحمان مسٹ میکو نمبر آئس۔ داڑے رجسٹرڈ وونٹ آتا کچ 41 ہزار 108 ءِ۔ جی بی 3 (الیکشن 22 نومبر اسکان ملتوی مسنے) جی بی 4 انا غٹ 42 حلقہ غاتا غیر حتمی و غیر سرکاری نتیجہ غاتا رداٹ پی پی پی نا امجد حسین ایڈووکیٹ حلقہ غان سرسہبی دوئی کرے۔ اونا سخت مقابلہ اسلامی تحریک پاکستان (آئی ٹی پی) نا اومیتدار محمد ایوب تون ئس۔ داڑے رجسٹرڈ وونٹ آتا کچ 23 ہزار 171 ءِ۔ جی بی اے 5 نا غٹ 26 پولنگ اسٹیشن تا غیر حتمی و غیر سرکاری نتیجہ غاتا رداٹ آزاد اومیتدار جاوید علی منواسرسہب مس۔
