اسلام آباد۔14نومبر (اے پی پی): مزن وزیر عمران خان ءَ کفالت پروگرام ءَ چہ سیت مند بوھوکیں مردم آنی کساس ءِ تہ ءَ گیش گیشی کنگ ءِ منظوری دات۔ مزن وزیر ءَ کفالت پروگرام ءَ چہ آسراتی چست کنوکیں مردم آنی کساس چھل لکھ ءَ چہ گیش ودینان ءَ ھپتاد لکھ کنگ ءِ منظوری داتتگ۔ فیصلہ مزن وزیر عمران خان ءِ سروکی ءَ احساس کفالت پروگرام ءِ تیاری ءِ ھوالگ ءَ دیوان ءَ کنگ بوت۔ دیوان ءَ مشیر ءِ ھزانگ ڈاکٹر عبدالحفیظ شیخ ( ویڈیو لنک) ءِ وسیلگ ءَ ، ھاسیں کمکار برائے گریبی ءِ ھلاس کنوک ڈاکٹر ثانیہ نشتر ءُ کلانہ ایں اپسرگ ھوار اتنت۔ مزن وزیر سیکرٹریٹ میڈیا ونگ ءِ نیمگ ءَ جاڑی بوتگیں ھال آنی رد ءَ ھاسیں کمکار ڈاکٹر ثانیہ نشتر ءَ دیوان ءَ را سرپد کت کہ سرجمیں دگنیا ءَ کورونا ھوپ ءِ سبب ءَ چاگرد ءِ ھمزوریں تبک ءِ مشکل آنی تہ ءَ گیشی بوتگ۔ سرجمیں دگنیا ءِ ملک آنی تہ ءَ کورونا ھوپ ءِ رد ءَ الس ءِ گہبود ءِ واستہ معاشی پیکیج داتگ۔ دیوان ءَ را گوشگ بوت کہ پاکستان ھما کامیاتیں ملک آنی لڑ ءَ ھوار انت ھما واں کورونا ھوپ ءِ ھلاپ ءَ کامیات ءَ گوں دیم پہ دیمی کتگ۔ حکومت ءِ پاکستان ءَ گہبود ءِ واستہ کورونا ھوپ ءِ رد ءَ گیش کمک پجاری گیشینتگ انت۔ میاں اوستمانی ادارگ ءُ میاں استمانی الس ءِ نیمگ ءَ چہ پاکستان ءِ گامگیج آناں ساڑاھگ بوھگ ءَ انت۔ مزن وزیر ءَ دیوان ءَ گوں گشتانک دیان ءَ اے وھد ءِ حکومت ءِ توامیں دلگوشی معاشی گہتری ءِ سر ءَ انت۔ آئی ءَ گوشت کہ کورونا ھوپ ءِ رد ءَ شہری آنی رکھینگ ءُ معاشی چست ءُ ایر آنی دوئین آنی سر ءَ دلگوشی انت۔ مزن وزیر ءَ گوشت کہ کورونا ءِ سبب ءَ پیداک بوھوکیں جاور آنی درستاں چہ مستریں بار گریب ءُ بزگر آنی سر ءَ پر بوھگ ءَ انت پمے ھاترا المی انت کہ احساس ءِ کار رپک ءِ تہ ءَ گیش گیشی کنگ بہ بیت۔ مزن وزیر ءَ احساس کفالت پروگرام ءَ را زوتاں زوت پکوئیں رنگ دیگ ءِ پنت ءُ شون کتگ۔
