تربت۔ 13 نومبر (اے پی پی) وزیراعظم عمران خان پارینے کہ بلوچستان نا پسماندگی نا سوب مستین نا حکمرانک ءُ، مستین اٹ بلوچستان نا سیاسی راہشونک ہم الس نا جاگہ غا جند انا فائدہ غاتے اولیت تسر، مستین اٹی سیاسی راہشونک بلوچستان آن زیات لندن و اسہ مسکوہی صدر اس بلوچستان آن زیات دبئی نا دورہ ءِ کرے، ساڑی حکومت نا دور اٹی سیاسی فائدہ غاتیان ایڑتر بلوچستان آن خاص چکار داخاطران کننگ انگ ءِ کہ دا شونداری ٹی پدی ءِ، نزور تپہ غاتے آسراتی فراوان کننگ آن بیدس اسہ قوم اس ہم شون ہلنگ کپک، نیا پاکستان ہاؤسنگ اسکیم بلوچستان اٹی ہم بناکننگک، موثر زرگزرانی پالیسی نا سوب آن کوروناآن پد ہم ملکی زرگزران سہی کنڈآ ہِننگ ءِ، 17 سال آن پد اولیکو وار کرنٹ اکاؤنٹ پلس ءِ، تدوک آ چار تُو اٹی ہچ ءُ پوسکن ءُ وام اس ہلتون، کورونا نا ارٹ میکو لہر آن پاکستان ہم زہمی مننگ ءِ، رکھی گام گیج آتیا عملدرآمد ءِ پک کروئی مریک۔ او جمعہ نا دے آ داڑے سویلی ضلع غاتا سرکڑدہ غاتیان تران کریکہ۔ وزیراعظم عمران خان پارے کہ بلوچستان شونداری ٹی داخاطرآن پدی سلیس انتئے کہ بلوچستان نا پسماندگی نا سوب مستین نا حکمرانک ءُ ، مستین اٹ بلوچستان نا سیاسی راہشونک ہم الس نا جاگہ غا جند انافائدہ غاتے اولیت تسر، مستین اٹی سیاسی راہشونک بلوچستان آن زیات لندن و دبئی نا دورہ ءِ کریر و بلوچستان آ ہرا چکار ءِ کروئی ئس او کننگتو۔ اوپارے کہ نزور تپہ غاتے بڑز اتنگ آن بیدس اسہ قوم اس ہم شون ہلنگ کپک، مدینہ نا ریاست حقی فلاحی ریاست ئس، چین 30 سال اٹی کروڑ آ بندغ آتے نیزگاری آن کشا، گچین پالیسی تا سوب چین اینو دنیا نا زرگزرانی واک جوڑ مسنے، چین دنیا ٹی غٹ آن زیات ترندی اٹ شون ہلوک آ ملک ءِ، سی پیک نا بھلا سوب داہم ارے کہ دیکی چین شونداری ٹی پدی ئس و چین اودے سمندر تون گنڈنگ خواہسکہ تانکہ او ہم شون ہلے۔ چین اتون اقتصادی راہداری ننکن شونداری نا زینہ مریک۔ اوپارے کہ سیاسی فائدہ غاتیان ایڑتر بلوچستان آ خصوصی چکار داخاطرآن کننگ انگ ءِ کہ داشونداری ٹی پدی ءِ، دادے ملک اناایلوصوبہ غاتا بریبر اتنگک، وزیراعظم نا حیثیت اُرانا سروک نا مریک و او غٹ صوبہ غاتا بریبر شونداری ءِ خواہک۔اوپارے کہ وزیراعلیٰ پنجاب ہم داڑے ساڑی ءِ، او بلوچستان اٹی یونیورسٹی و ہسپتال اٹی زرکاری کرینے، دا بھلا ایلم نا کنڈآں چنکا ایلم کن امداد اسے، بلوچستان نا محرومی تیان فائدہ ہرفوک آک داخاطرآن ہم سرسہب مریرہ انتئے کہ مخلوق اٹی دا تاثر مون آ بریک کہ ننے انت فائدہ مسنے۔ اوپارے کہ بلوچستان اٹی شونداری مننگ والا ءِ، دانا تصور ءِ ہم کننگ مفک، بلوچستان چین اتون گنڈنگ انگ ءِ۔ اوپارے کہ نیا پاکستان ہاؤسنگ اسکیم نا رداٹ بلوچستان نا مخلوق ہم فائدہ ہرفنگ کیک و پنچ مرلہ نا اُراتا تفنگ کن پنچ درسد نا شرح سود آ وام ہلنگ مریک، وام آ زیات شرح حکومت نا کنڈآن ادا کننگک، پی ٹی آئی حکومت اولیکو وار ملک اٹی ہاؤسنگ اسکیم درستی راستی کرفینے، احساس پروگرام نا رداٹ ہم دوسد ارب روپئی حقدار بندغ آتے فراوان کننگانے، مہالو ملکی تاریخ اٹی داوڑنامہالو پروگرام بناکننگتنے۔ اوپارے کہ بلوچستان نا مرمر انگا علاقہ غاتیٹی انٹرنیٹ نا آسراتی ءِ فراوان کننگک، انٹرنیٹ نا آسراتی آن ورناچین انا شونداری مریک۔ اوپارے کہ دنیا ٹی کورونا دین انا ارٹ میکولہر تباہی کرینے، بھارت نا زرگزران ہم کورونا ناسوب 73 سالہ تاریخ اٹی بھاز بے وڑ زہمی مسنے، مچ آ دنیاٹی کورونا ناعذاب بسنے، اللہ نا شکر ءِ کہ پاکستان کورونا نا اولیکو لہر اٹی دنیا نا ایلو ملک آتا نسبت کم زہمی مس۔ کورونا نا ارٹ میکو لہر آن پاکستان ہم زہمی مننگ ءِ رکھی گام گیج آتیا عملدرآمد ءِ پک کروئی مریک، پاکستان ہراوڑاٹ کورونا نا حالیت آتون مون تننگ اٹ سرسہب مس، برصغیر نا اسہ ملک اس ہم داوڑکورونا آن پیش تمنگ کتنے، کورونا نا مہالو خراج وصولی نا ہدف سہی کنڈآ ہناکہ ولے کورونا نا سوب آن خراج وصولی ٹی 900 ارب روپئی ناکمتی مسنے ولے داکان پد ہم نن بلوچستان نا شونداری کن پیکج تننگ اُن۔ اوپارے کہ زرگزران شون ہلنگ ءِ، 17 سال آن پد اولیکو وار کرنٹ اکاؤنٹ سرپلس ءِ، تدوک آ چار تُو اٹی ہچ ءُ پوسکن ءُ وام اس ہلتنون۔ سیمنٹ، سریا، گاڈی و موٹرسائیکل تا ریکارڈ بہاہم مثبت ٹک ءِ و پاکستان نا اسٹاک مارکیٹ نا شمار ایشیا نا گچین اسٹاک مارکیٹ آتیٹی مننگ ءِ۔ دود اٹی گورنر بلوچستان امان اللہ خان یاسین زئی، وزیراعلیٰ بلوچستان جام کمال خان، وزیراعلیٰ پنجاب عثمان بزدار، ڈپٹی اسپیکر قومی اسمبلی قاسم خان سوری، بنجائی وزیر ڈٹ بندی و شونداری اسد عمر، بنجائی وزیر پیداوار زبیدہ جلال، بنجائی وزیر مواصلات مراد سعید، پارلیمنٹ ناباسک آک و علاقہ نا سرکڑدہ غاک بھلوکچ اسے ٹی ساڑی ئسر۔
