تربت۔ 13 نومبر (اے پی پی) وزیراعظم عمران خان پارینے کہ بنجا نا سوگوی کن غٹ اکائی تیٹی اسہ وڑ شونداری المی ءِ،م بلوچستان شون ہلیک تو پاکستان شون ہلیک، پسماندہ علاقہ غاتیٹی اسہ وڑ شونداری خوانہ، تعلیم و جان جوڑی نا بشخ آتا شونداری آ خاص چکار کننگ اُن، ورناک پاکستان نا آخبت ءُ، ہراقومک انسانی وسیلہ غاتیا خڑچ کریر اوفک شون ہلکر، تعلیم نا سوب آن انسان عظمت دوئی کرے، سرسہبی کن خواری کروئی تمک، زند اٹی ہچ ءُ شارکٹ کٹ اس مفک، پنجاب حکومت نا کنڈآن بلوچستان نا طالب علم آتیکن وظیفہ غاتیٹی ودکی ستاکڑزک۔ اوداخیال آتا درشانی ءِ جمعہ نادے آ داڑے دارلاحساس، وسیلہ تعلیم پروگرام و چندی ڈٹ آتا بنائی دود آن تران کرساکرے۔ داوخت آ وزیر اعلیٰ بلوچستان جام کمال خان وزیراعلیٰ پنجاب عثمان بزدار، ڈپٹی اسپیکر قومی اسمبلی قاسم خان سوری ئسک ہم ساڑی ئسر۔ وزیراعظم عمران خان پارے کہ ورناک پاکستان نا آخبت ءُ، ہراقومک انسانی وسیلہ غاتیا خڑچ کریر اوفک شون ہلکر۔ اوپارے کہ تعلیم نا سوب آن انسان عظمت دوئی کرے۔ ریاست مدینہ ٹی انسانیت و کانود ناحکمرانی اہم اصول ئس۔ ریاست مدینہ ٹی تعلیم نا دوئی کننگ ہم بھاز اہمیت تخاکہ، تعلیم نا سوب آن اسہ وخت ہموہم ئس ہراتم دنیا نا غٹ آن بھلا سائنسدان مسلمان مسکہ ولے نن تعلیم نا بشخ اٹی پدی سلیسونن و ننا بھاز انگا علاقہ غاک شونداری ٹی پدی ءُ، داسہ نن ہمو علاقہ غاتا شونداری آ چکار کننگ اُن۔ اوپارے کہ تحریک انصاف نا حکومت بلوچستان نا شونداری کن اخہ دار فنڈ فراوان کرینے، ہموخہ در پیسہ مہالو اسُل تننگتنے۔ ورناک ملک انا آخبت ءُ و ورناتے ہی بلوچستان ءِ شون تروئی ءِ، دا چرجوئی ٹی نن وزیراعلیٰ پنجاب تون اواری اٹ ورنا و خاص کر تعلیم نا شونداری کن گام گیج کینہ۔ اوپارے کہ انفارمیشن ٹیکنالوجی نا شونداری دنیا ٹی انقلاب اس برپاکرینے، کورونا حالیت آتیٹی آن لائن ایجوکیشن سسٹم ءِ مون آ دننگا۔ اوپارے کہ داسہ پوسکن آ ٹیکنالوجی نا دور ءِ ہرانا کمک اٹ مرمُر انگا علاقہ غاتیٹی ہم تعلیم تننگ مریک، دامسخت کن نن پبی زرکاری کینہ۔ اوپارے کہ پنجاب بلوچستان نا شونداری کن زرکاری کننگ ءِ، پنجاب حکومت نا کنڈآن بلوچستان نا طالب علم آتیکن وظیفہ غاتیٹی ودکی ستاکڑزک۔ پنجاب حکومت بلوچستان نا 360 طالب علم آتے بڑزکو تعلیم کن وظیفہ ایتک، داڑکن پنجاب نا وزیراعلیٰ داد اناحقدار ءِ۔ وزیراعظم پارے کہ او خواہک کہ پاکستان اسہ سوگو بنجا اس مرے۔ بلوچستان نا شونداری پاکستان نا شونداری ءِ و داڑآن نن غٹ متحدہ مرینہ۔ بنجانا سوگوی کن غٹ اکائی تیٹی اسہ وڑ شونداری المی ءِ۔ اوپارے کہ پسماندہ علاقہ غاتیٹی اسہ وڑ شونداری خوانہ ، تعلیم و جان جوڑی نا بشخ آتیٹی شونداری آ خصوصی چکار کننگ اُن۔ اوسرسہبی کن خواری کروئی مریک۔ زند اٹی ہچ ءُ شارکٹ کٹ اس مفک، انسان ہر مشکل وخت آن ہیل کیک و تینا غلطی تا اصلاح ءِ کرسا ہی مون آکاہک۔ خراب وخت و بے سہبی تیان خلینگپ و چیلنج آتیان ہیل کننگے، بلوچستان اٹی آخبت نا قیادت کن تعلیم یافتہ بندغ آتا گرج ءِ و دا چرجوئی ٹی ورناک مون آ بریر۔
