اسلام آباد۔ 13 نومبر (اے پی پی) بنجائی وزیر ڈٹ بندی شونداری و خصوصی گام گیج اسد عمر نا کماشی ٹی وزیراعظم سرسہب ورنا پروگرام نا بابت جاچ دیوان اس مس۔ دیوان اٹی وزیراعظم نا خصوصی کمکار امور نوجوانان عثمان ڈار بنجائی وزیر ءِ سرسہب ورنا پروگرام نا رداٹ ورناتا شونداری کن بناکروک آ ڈٹ آتا بابت سرجم حوال تس۔ خصوصی کمکار نیشنل یوتھ کونسل، سکلز فار آل، یوتھ انٹرپرنیور شپ(کاروبارو وام تا پروگرام) و ٹائیگر فورس انا کارکڑد نا بابت حوال تس۔ خصوصی کمکار پارے کہ مچ آ ملک انا ورناتے سرسہب ورنا پروگرام نا رداٹ کاروبار کن 100 ارب روپئی نا بھلو زر اس جتا کننگانے ہرانارداٹ مچ آ ملک آن خوانوک آ ورناتے چنکا کاروبار کن وام تا زرتس سرسہبی اٹ برجاءِ۔ عثمان ڈار نا مستی پاننگ ئس کہ 50 ہزار ورناتے روزگار تون اوار اوار تکنیکی تربیت ہم فراوان کننگ انگ ءِ۔ بنجائی وزیر اسد عمر نا داوخت آ پاننگ ئس کہ ساڑی آ دور انا چیلنج آتے مون آ تخسا ورناتے کسبکار کننگ ناءِ۔ اوپارے کہ کسبکار و باصلاحیت ورناتے شفاف وڑاٹ میرٹ آ وام ایتر تانکہ الس نا خراج نا پیسہ غاک سیاسی بنداو تیا بشخنگپس۔ اسد عمر پارت کرے کہ پی ایم پورٹل آ غٹ نوکری تا بابت اسہ لنک اس جوڑ کننگے تانکہ ورنا چین ءِ اسہ ہی پلیٹ فارم آ غٹ معلومداری دُوبرے، اومستی پارے کہ حکومت نا اولیت ورناتے واکدار و کسبکار کننگ نا ءِ ہراڑکن او ہرممکن کوشست کننگ اٹ اختہ ءُ۔
