اسلام آباد۔ 13 نومبر (اے پی پی) ترجمان دفترخارجہ پاکستان اٹی اقلیت آتا بے رکھ مننگ و دہشت گردی نا بابت بھارتی وزارت خارجہ نا سٹی آ دوبہ غاتے مسترد کرسا پارینے کہ بھارت تینا ملک اٹی اقلیت آتا برخلاف ناروا سلوک و دہشت گردی آن چکار ءِ اسہ کنڈ کننگ خواہک۔ جمعہ نادے آ ترجمان بھارتی وزارت خارجہ نا سٹی آ دوبہ غاتیا سخت ردعمل نا درشانی ءِ کرسا پارینے کہ بھارت دروغ و سٹیءُ دوبہ خلسا مقبوضہ جموں و کشمیر اٹی ریاستی دہشت گردی و تینا ہی اقلیت آتا برخلاف امتیازی سلوک آن جہانی چکار ءِ اسہ کنڈ کننگ کپک۔ ترجمان پارے کہ بھارت سٹی آ دوبہ غاتے اٹ دروغ ءِ راست اٹ بدل کننگ کپک۔ داوڑنا مایوس کن کوشست آک بھارت نا ملکی و خارجہ پالیسی نا بے سہبی تیان چکار ءِ اسہ کنڈکننگ اٹ سرسہب مفسہ۔ اوڑآن چپ اسہ زموار ملک اسے نا حیثیت اٹ بھارت نا ساکھ ءِ پین نسخان رسینگک۔ ترجمان بھارت آ زور شاغا کہ او دہشت گردی ءِ بطور ریاستی پالیسی نا کاریم اٹ اتنگ آن پاناد کے۔ مقبوضہ کشمیر اٹی کشمیری الس نا انسانی حق انا بھلا خلاف ورزی تے بند و تینا شاری تا حق انا رکھ اکن پبی گام گیج کے و کشمیر نا جھیڑہ ءِ اقوام متحدہ نا سلامتی کونسل نا قرارداد آتا رداٹ ایسر کننگے۔
