اسلام آباد۔12نومبر (اے پی پی):صدر مملکت ڈاکٹر عارف علوی ءَ وزارت ءِ وانگ ءُ زانگ، منیشات ءِ گر ءُ داری فورس ءُ کانود ءِ مھکم داروک آنی نیام ءَ نزیکیں کمک ءِ ضلورت ءِ سر ءَ زور پر دیان ءَ گوشت کہ ہائیر ایجوکیشن کمیشن وانگ ءُ زانگی ادارگ آنی تہءَ ھاسیں نودربر آنی گہبود ءُ آسراتی ءِ واستہ گامگیج بکن انت، ھاسیں نودربر آناں ٹیوشن فیس ءِ تہ ءَ یلوئی، وانگ ءُ زانگی ادارگ ءِ تہ ءَ روگ ءُ آیگ ءِ سر ءَ ھاسیں آسراتی ءُ امبر ءِ کچ ءُ کساس ءِ تہ ءَ نرمی کنگ بہ بیت۔ اے ھیالانی درشانی آئی ءَ پنچ شمبے ءِ روچ ءَ کمیٹی برائے منشیات ءِ گر ءُ دار ءُ نودربر آنی گہبود ءِ دیوان ءِ سروکی ءَ کنان ءَ کت۔ دیونا ءَ بنجاھی وزیر وانگ ءُ زانگ ، شفقت محمود ، منشیات ءِ گر ءُ داری وزیر، محمد اعظم خان سواتی، وزیر بنی آدمی ھک، ڈاکٹر شیریں مزاری، چیئرمین ایچ ای سی ءُ جتا جتائیں وزارت آنی ٹوھیں کارندہ آں بھر زوری کت۔ دیوان ءَ وانگ ءُ زانگی ادارگ آنی منشیات ءِ ھوپ ءِ ھلاسی ءِ وستہ جتا جتائیں شور ءُ مشور کنگ بوت۔ صدر ءِ مملکت ڈاکٹر عارف علوی ءَ گوشت کہ ہائیر ایجوکیشن کمیشن مارچ 2021 ءَ تاں ملکی دانشگاہ آنی تہ ءَ منشیا ءِ گر ءُ دار ءِ واستہ ڈرگ پالیسی رد ءُ بند بکن انت، نودربر آناں منشیات ءِ ھوپ ءَ چہ رکھینگ ءُ ایشاناں جان سلامتیں وانگ ءُ زانگی جاور پجاری کنگ بہ بیت۔ دیوان ءَ وانگ ءُ زانگی ادارگ آنی وائس چانسلرز آں منیشات ءِ کارمردی ءِ واستہ ویڈیو لنک ءِ وسیلگ ءَ شور ءُ مشور دات۔ صدر ڈاکٹر عارف علوی ءَ گوشت کہ ایچ ای سی وانگ ءُ زانگی ادارگ آنی تہ ءَ ھاسیں نودربر آنی گہبود ءُ آسراتی ءِ واستہ گامگیج بکنت، ھاسیں نودربر آناں ٹیوشن فیس ءِ یلوئی، وانگ ءُ زانگی ادارگ آنی تہ ءَ روگ ءُ آیگ ءِ ھاسیں آسراتی ءُ امبر ءِ کساس ءِ تہ ءَ نرمی دیگ بہ بیت۔
