اسلام آباد۔ 12 نومبر (اے پی پی) چیئرمین سینیٹ محمد صادق سنجرانی بحرین نا وزیراعظم خلیفہ بن سلمان الخلیفہ نا کزیت آ است ہسونی نا درشانی ءِ کرسا پارینے کہ پاکستان اسہ بے مٹ ءُ سنگت اسے آن محروم مس، بحرین نا وزیراعظم ہڑتوم آ ملک آتیٹی بے مٹ ایلم نا روشنا علامت و شون پسند سوچ تخوک آ عظیم راہشون ئس۔ داخیال آتا درشانی ءِ او پنچ شنبے نادے آ داڑے بحرین نا سفارتخانہ غا بننگ و بحرین نا پاکستان اٹ تعینات سفیر محمد ابراہیم محمد عبدالقادر تون بحرین نا سرکڑدہ و غمزدہ خاہوت کن ہڑزخواہی نا درشانی ءِ کرسا کرے۔ چیئرمین سینیٹ پارے کہ پاکستان اسہ بے مٹ ءُ سنگت اسے آن محروم مس۔ بحرین نا وزیراعظم ہڑتوم آ ملک آتیٹی بے مٹ ایلمی نا روشنا علامت ئس۔ ایماندار خلیفہ بن سلمان الخلیفہ شون پسند سوچ تخوک آ عظیم راہشون ئس۔ اوپارے کہ خلیفہ بن سلمان الخلیفہ نا کماشی ٹی بحرین اقتصادی و زرگزرانی شونداری نا اسہ پوسکن ءُ دور اس خنانے۔ ایماندار وزیراعظم بحرین نا کزیت آن پاکستان اسہ عظیم و مخلص ءُ سنگت اسے آن محروم مس۔ خلیفہ بن سلمان الخلیفہ نا بین المذاہب ہم آہنگی و امن کن خذمت آک ناقابل فراموش ءُ۔ پاکستانی قوم بحری نا حکومت، الس و سرکڑدہ غاتون ڈکھیا نا داساہت اٹی بریبر نا شریک ءُ۔ چیئرمین سینیٹ زرس وخت بحرین نا سفارتخانہ ٹی گدریفے و خلیفہ بن سلمان الخلیفہ نا کزیت آ سفیر بحرین و سفارتخانہ نا سینئر آفیسر آتون ہڑزخواہی و فاتحہ خوانی کرے۔ بحرین نا وزیراعظم نا کزیت آ ہڑزخواہی کتاب اٹی تینا تاثر آتے نوشتہ کرے۔ داوخت آ چیئرمین سینیٹ محمد صادق سنجرانی تون اوار سینیٹر سجاد حسین طوری، اشوک کمار و نصیب اللہ بازئی ئسک ہم ساڑی ئسر۔
