اسلام آباد۔ 12 نومبر (اے پی پی) پاک بحریہ نا سروک ایڈمرل محمد امجد خان نیازی پارینے کہ سی پیک تون گنڈوک شونداری ٹی میری ٹائم سیکورٹی کلیدی کڑد اس تخک۔ او کوسٹل ایریہ غاتا دورہ ءِ کننگ نا وخت آ پاک بحریہ نا آفیسر و ورناتتون گپ وتران کریکہ۔ ترجمان پاک بحریہ نا رداٹ پاک بحریہ نا سروک ایڈمرل محمد امجد خان نیازی کوسٹل ایریہ غاتیٹی پاک بحریہ نا تنصیبات آتا دورہ ءِ کرے و تربت، گوادر و اورماڑہ ٹی پاک بحریہ نا آپریشنل تیاری و سرجز آتا جاچ ءِ ہلک۔ تربت آ بننگ آ کمانڈر پاکستان فلیٹ و اورماڑہ نا دورہ ٹی کمانڈرکوسٹ ہم نیول چیف اتون اوار ساڑی ئس۔ نیول ایئر اسٹیشن تربت آ بننگ آ نیول چیف ءِ نیول ایئر آرم آپریشن تیا حوال تننگا۔ نیول چیف ءِ گوادر پورٹ و سی پیک نا کوسٹل سیکورٹی آ ہم حوال تننگا۔ پاک بحریہ نا سروک جناح نیول بیس و کیڈٹ کالج اورماڑہ نا ہم دورہ ءِ کرے۔ نیول چیف دا اسٹیشن تیا تعینات پاک بحریہ نا آفیسر و ورناتتون وخت تیر کرے و اوفتا جوزہ غاتا ستاءِ کرے۔
