اسلام آباد۔ 12 نومبر (اے پی پی) بنجائی وزیر مذہبی امور پیر نورالحق قادری تون مصر انا سفیر طارق دروگ پنچ شنبے نادے آ داڑے اوڑدہی کرے۔ اوڑدہی ٹی مصر انا شیخ الازہر نا کنڈآن چارلی ہیبڈو و فرانس نا برخلاف جہانی عدالت انصاف آ ہِننگ نا فیصلہ غا گپ وتران مس۔ داوخت آ بنجائی وزیر مذہبی امور پارے کہ پاکستان مفتی اعظم مصر شیخ الازہر احمد الطیب نا فیصلہ نا ستاءِ کیک و اونا پورو مخ تفی ءِ کیک۔ وزیراعظم عمران خان مصر ءِ امنائی حکمت عملی و ہروڑکمکاری نا پیشکش کرینے۔ اوپارے کہ فرانس نا گستاخانہ خاکہ، چارلی ہیبڈو نا برخلاف کانودی جنگ اٹ مصر انا پورو مخ تفی ءِ کینہ۔ پیر نور الحق قادری پارے کہ نمان مسلم شخصیت آتا مسیحی و یہودی مذہبی راہشون تتون اوڑدہی تا سلاہ غاہم سجفنگ انگ ءِ۔ اوپارے کہ مسیحی و یہودی مذہبی راہشون تے باور کرفنگے کہ داوڑنا گام گیج مذہبی خار و جہانی امن کن نسخاندہ ءُ۔ پیر نورالحق قادری پارے کہ داویل آ وزیراعظم عمران خان شیخ الازہر مصر اتون ٹیل فون آ ہیت کیک۔ مصر انا سفیر پارے کہ آخبت اٹ داوڑنا واقعہ غاتا توننگ کن مسلم امہ ءِ یکجا مرسا کوشست کننگ نا گرج ءِ۔ اووزیراعظم نا کنڈآن مخ تفی نا پڑو ءِ کننگ آ پاکستان نا منت واری ءِ ہرفے۔
