ساڑی حکومت سیل و سوات نا بشخ آ خاص چکار کننگ ءِ، صوبہ نا سیل وسواتی ہند خاص وڑاٹ مرغن کرکی پٹی و داجاگہ نا سیل وسواتی ہند آتے سیل و سواتی تیکن پرکشش جوڑ کننگ کن غٹ تر دوئی وسیلہ غاتے کاریم اٹ اتنگے، وزیراعلیٰ بلوچستان جام کمال خان

کوئٹہ۔ 11 نومبر (اے پی پی) وزیراعلیٰ بلوچستان جام کمال خان پارینے کہ ساڑی حکومت سیل و سوات نا بشخ آ خاص چکار کننگ ءِ۔ صوبہ نا سیل و سواتی ہند خاص وڑاٹ مرغن کرکی پٹی و داجاگہ نا سیل و سواتی ہند آتے سیل و سواتی تیکن پرکشش کننگ کن غٹ تر دوئی وسیلہ غاتے کاریم اٹ اتنگے، داخیال آتا درشانی ءِ او بلوچستان کوسٹل ڈویلپمنٹ اتھارٹی نا کنڈآن سونمیانی بے پربیچ و گوازی تا سرجز آتا بابت ڈٹ اکن نجی زرکار آتا بشخ ہلنگ نا بابت ایکسپریشن آف انٹرسٹ آ مروک آ پیش رفت نا بابت دیوان نا کماشی ءِ کرسا کرے، دیوان اٹی پارلیمانی سیکرٹری گودی بشریٰ رند، دنیش کمار، چیف سیکرٹری بلوچستان فضیل اصغر، سینئر باسک بورڈ آف ریونیو قمر مسعود، ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری حوالکاری شاہ عرفان غرشین، سیکرٹری ایمپلی مینٹیشن عبداللہ خان و ایلوتعلقدار کمامدارآک بشخ ہلکر۔دیوان ءِ ڈائریکٹر جنرل بلوچستان کوسٹل ڈویلپمنٹ اتھارٹی (بی سی ڈی اے) حوال ترسا پارے کہ سونمیانی بے آ سیل و سوات و گوازی تا مون آ دننگ نا ڈٹ آتیکن ایکسپریشن آف انٹرسٹ نا بناءِ کننگانے ہراڑآن نجی بشخ انا شریداری ممکن مننگ کیک۔ دیوان اٹی وزیراعلیٰ پارت کرسا پارے کہ پبلک پرائیویٹ پارٹنر شپ ترمیمی بل 2020ء نا منظوری و ای او آئی نا بابت گڑاس المی بدلی کننگے، دیوان اٹی فیصلہ کننگاکہ دا اہم وڑنا ڈٹ اکن اولیکو مرحلہ ٹی 200 ایکڑ ڈغار کن رینٹل بنداو تیا ٹینڈر نا بناءِ کرسا دادے علاقہ نا شونداری نا عمل اتون گنڈنگے، دیوان اٹی امنا کننگاکہ پی پی پی بل 2020ء ٹی المی ترمیم آن پد ڈٹ انا ایلو ماندہ ایریاتے پبلک پرائیویٹ پاٹنر شپ انا رداٹ پراسس کننگے۔ دیوان آن تران کرسا وزیراعلیٰ پارے کہ سیل و سوات نا بشخ انا شونداری آن نئے بیرہ صوبہ نا زرگزران سوگو مریک بلکن جم وڑاٹ صوبہ نا کٹیا ٹی ہم خاطرخواہ ودکی مریک، صوبہ نا مریس کرکی پٹی بھاز اہمیت نا حامل ءِ ہراڑآن فائدہ ہرفنگ نا گرج ءِ تانکہ سیل و سوات تون اوار ایلو مثبت و تعمیری سرجزآتے مون آ دننگ مرے۔