اسلام آباد۔ 11 نومبر (اے پی پی) پاکستان، چین، بنگلہ دیش، نیپال و سری لنکا نا کوویڈ۔ 19 رسپانس نا بابت نائب وزارتی کہول آ دیوان ویڈیو کانفرنس نا کمک اٹ اڈ ہلک۔ سیکرٹری خارجہ سہیل محمود پاکستان نا نمائندگی ءِ کرے وخت اس کہ چین انا نائب وزیر خارجہ مسٹر لیوزوہوئی کماشی ءِ کرے۔ سیکرٹری خارجہ داہیت آ زور شاغا کہ کوویڈ۔ 19 نا دین انا برخلاف جنگ اٹی سرسہبی کن جہانی کہول آ اسیجائی کوشست، کمک و یکجہتی نا گرج ءِ۔ جہانی ادارہ جان جوڑی ِ دینی مرض اتون مون تننگ اٹ مرکزی کڑد ادا کے۔ سیکرٹری خارجہ پارے کہ پاکستان کوویڈ۔ 19 نا سرسہبی اٹ مقابلہ ءِ کرے و ملک اٹی جان جوڑی نا نظام ءِ سوگو کننگ کن ہروڑ نا گام گیج کرے۔ سیکرٹری خارجہ داہیت آ زور شاغا کہ ڈائریکٹر جنرل (ڈبلیو ایچ او) کوویڈ۔ 19 تون مون تننگ کن پاکستان نا گچین کوشست آتے امنا کرینے۔ سیکرٹری خارجہ پارے کہ دین انا مونءِ توننگ اٹ سرسہبی آن پد، پاکستان صحت عامہ، زرگزران نا گچینی و نیزگاری نا چٹفنگ کن ودکی گام گیج کننگ ءِ۔ اوپارے کہ پاکستان و چین ایس او پی تیا سختی اٹ عملدرآمد کرسا واپار، جہاز، و السی ہن و بر نا بحالی کن گچین گام گیج کننگ ءُ وخت اس کہ پی آئی اے چین اکن ہفتہ وار واپاری جہاز آتا دوارہ بناءِ کرینے، سیکرٹری خارجہ اومیت ظاہر کرے کہ پاکستانی طالب علم آتا چین آ واپسی ناعمل نا زوت بناءِ کینہ۔ سیکرٹری خارجہ داہیت انا درشانی ءِ کرے کہ کوویڈ۔ 19 نا ویکسین ءِ ہراتم ہم تیار کننگک، او جہانی کہول آ الس کن دستیاب مرے و بریبر بنداو تیا فراوان کننگے۔ اوپارے کہ پاکستان اٹی چینی ویکسین نا کلینیکل ٹرائلز نا مسٹ میکو ریسہ ٹی ترندی اٹ پیش رفت برجاءِ۔
