اسلام آباد۔ 11 نومبر (اے پی پی) اسپیکر قومی اسمبلی اسد قیصر پارینے کہ پاکستان و چین انا نیام اٹ یکتا وڑنا دوستانہ تعلقداری دنیا کن اسہ درور اسے، ہڑتوم آ سنگت ملک آتیٹی تعلقداری تین پہ تینی شرف، فائدہ و اسٹریٹجک شریداری آ استوار ءِ۔ ہڑتوم آ سنگت ملک آتا نیام اٹ تعلقداری ہر تدوک آ دے اتون سوگو آن سوگو مننگ ءِ، ہندا تُو اٹی سی پیک نا رداٹ رشہ کئی اکنامک زون انا بنامننگ ءِ۔ داخیال آتا درشانی ءِ او چین نا سفیر نونگ رونگ تون گپ وتران کرسا کرے ہراچارشنبے نا دے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری، اہم علاقائی و جہانی باندات و تین پہ تینی است خواہی نا ایلو باندات آتیا گپ وتران کننگا۔ اسپیکر چین انا سفیر نونگ رونگ ءِ پاکستان اٹ بطور سفیر زمواری سنبھالنگ آ مبارکبادی تس۔ اوڑدہی ٹی اسپیکر قومی اسمبلی اسد قیصر پارے کہ نونگ رونگ نا سیاسی و سفارتی پڑاٹ بھلا آزموندہ ہڑتوم آ ملک آتیٹی تعلقداری تے پین ودفنگ اٹ اہم مزل نا نشان مریک۔ سنگت ملک چین انا کنڈآن نونگ رونگ انا بطور سفیر تعیناتی ہڑتوم آ کنڈآتا تعلقداری تے پوسکن آ جہد تننگ نا عزم انا درشانی ءِ ۔ اوپارے کہ پاکستان و چین نا نیام اٹ یکتا وڑنا دوستانہ تعلقداری دنیا کن اسہ درور اسے۔ ہڑتوم آ سنگت ملک آتیٹی تعلقداری تین پہ تینی شرف، پت، فائدہ و اسٹریٹجک شریداری آٹے۔ اوپارے کہ ہڑتوم آ سنگت ملک آتا نیام اٹ تعلقداری ہر تدوک آ دے اتون سوگو آن سوگو مننگ ءِ۔ اسد قیصر پارے کہ چین و پاکستان علاقائی و جہانی باندات آتیا اسہ وڑ موقف تخرہ و ہڑتوم آ سنگت ملک آک علاقائی و جہانی فورم تیا اسہ ایلو نا موقف نا مخ تفی ءِ کرینو۔ چین پاکستان اقتصادی راہداری ڈٹ سنگت ملک چین انا کنڈآن پاکستان کن اسہ ٹیکی اسے۔ اوپارے کہ چین پاکستان اقتصادی راہداری (سی پیک) و ون بیلٹ ون روڈ انا گام گیج مچ آ ڈیہہ نا شونداری و شونہالی نا ڈٹ ءِ۔ ہندا تُو اٹی سی پیک نا رداٹ رشہ کئی اکنامک زون انا بنامننگ ءِ۔ اسپیکر قومی اسمبلی پارے کہ رشہ کئی اکنامک زون آن پاکستان اٹی صنعتی بشخ ءِ مون آ دنگن دوئی مریک ہراڑآن علاقہ ٹی شونداری و شونہالی نا اسہ پوسکن ءُ دور اس بناکیک۔ ہڑتوم آ ملک آتا پارلیمانی تا نیام اٹ رابطہ غاتا مون آ دننگ آن ہڑتوم آ کنڈآتا تعلقداری تے پوسکن آ بڑزی تسکان سرکننگ مریک۔ داوخت آ چین انا سفیر نونگ رونگ سفتی ہیت آتیا اسپیکر قومی اسمبلی اسدقیصر نا منت واری ءِ ہرفسا پارے کہ چین پاکستان تون تینا بے مٹ سنگتی ءِ قدر انا نظر اٹ ہرک۔
