اسلام آباد۔ 11 نومبر (اے پی پی) نیشنل کمانڈ اینڈ آپریشن سینٹر (این سی او سی) دینی مرض انا ارٹ میکو لہر اٹی کورونا دین انا ودوک آ تالانی ءِ توننگ کن بھلا السی مچی تیا پابندی خلنگ و زیات خطرہ والا علاقہ غاتیٹی پابندی تے ودفنگ نا سلاہ پیش کرے۔ بنجائی وزیر ڈٹ بندی، شونداری و خصوصی گام گیج اسد عمر نا کماشی ٹی این سی او سی نا دیوان اٹی تعلیم نا بشخ اٹی دینی مرض انا حساب وکتاب و ناجوڑی تا تالانی نا جاچ ءِ ہلنگا۔ فورم ءِ پاننگاکہ این سی او سی تینا حتمی فیصلہ کن قومی رابطہ کمیٹی (این سی سی) ءِ 12 اکتوبر و3 نومبر آ بھلا السی مچی و پیشن نا سرجزآتیا پابندی خلنگ کن سلاہ پیش کریسس۔ ولے غٹ اسٹیک ہولڈر آتا کنڈآن فیصلہ غا امنائی سلاہ مننگ داسکان سلوک ءِ داکان پد ہم ناجوڑی ٹی مسہ گناہ ودکی مون آ بس۔ فورم ءِ حوال تننگاکہ تعلیمی ادارہ غاتیٹی دین انا تناسب ودنگ ءِ وخت اس کہ دا حالیت آتیا نظر تخنگ نا گرج ءِ۔ فورم داہیت انا فیصلہ ءِ کرے کہ 16 نومبر آ بنجائی وزیر تعلیم این سی او سی ٹی صوبائی وزیر تعلیم تون اسہ خصوصی دیوان نا کماشی ءِ کیک ہراٹی عمومی وڑاٹ مچ آ ملک اٹی دین انا تالانی نا رجحان نا جاچ ءِ ہلنگک ہرانا مسخت مچ آ ملک انا تعلیمی ادارہ غاتیٹی ساڑی مثبت رجحان نا جاچ ءِ ہلنگ نا ءِ۔ سلابتی دیوان آن پد داٹی مروک آ فیصڷہ و نفاذ کن سلاہ و سوج صوبہ غاتون شیئر کننگک۔ فورم تعلیمی سال انا ہدف آتے ملوک آ نسخان آن بچنگ کن و دادین انا ودوک آ رجحان نا رداٹ فورم دا سلاہ ءِ پیش کرے کہ زوت و مریس یخ انا موسم نا چھٹی تا پڑو ءِ کننگے تانکہ دین انا تالانی ءِ کم کننگ مرے و داڑتون اوار اوار طالب علم آتا جانجوڑی و رکھ ءِ پک کننگ مرے۔ این سی او سی برام نا دود آتا بابت غٹ اسٹیک ہولڈر آتون غٹ راہشون اصول آتے شیئر کرینے ہرافتا رداٹ 20 نومبرآن بیرہ پیشن برام تا مچی تا موکل مریک ہراٹی بیرہ 500 بندغ نا ساڑی مننگ نا موکل مریک۔ دیوان اٹی این سی سی نا دیوان ءِ بٹنگ انگ آ ہم امنا کریر ہراٹی زیات خطرہ والا بشخ و دا دین انا زیات آن زیات تالانی والا شار تیا پین پابندی تے ودفنگ نا ہم سفارش کننگا خاص کر بھلا السی مچی تیا۔ این سی او سی مسیت آتیٹی داتم اسکان ایس او پی تیا عملدرآمد نا ستاءِ کرے ہراڑآ تدوک آ کیہی تُو آن پبی عملدرآمد کرفنگاکہ ولے فورم داہیت انا پیدواری ءِ کرے کہ تدوک آ منہ دے آن رکھی گام گیج آتیا کمتی مون آ بننگ ءِ اوغٹ اسٹیک ہولڈر آتیان خواست کرے کہ او ہندا ایس او پی تیا عملدرآمد زیات و گچین کیر تانکہ دا دین انا گمانی ارٹ میکو ریسہ غان بچنگ مرے۔ داکان بیدس ریسٹورنٹ آتیٹی پیشن آ تولسا اِرغ کُننگ نا موکل مریک و داڑتون ٹیک اوے نا آراتی شام انا 10 بجہ اسکان برجاتخنگ نا موکل مریک وخت اس کہ فورم داسلاہ ہم تس کہ سینما و تھیٹر و مزار آتے دمدستی بند کننگے وخت اس کہ مارکیٹ و کاروباری ہند آتے زوت بند کننگ و خاص انگا دے تیٹی بند کننگ نا سفارش ہم پیش کننگا۔
