اسلام آباد۔ 11 نومبر(اے پی پی) پاکستان و ایران گڑاس یورپی ملک آتیٹی اسلاموفوبیا نا ودوک آ رجحان آ گڑتی نا درشانی ءِ کرسا پیدوار کرینو کہ آجوئی سلاہ درشانی نا آڑ اٹ توہین آمیز رویہءِ ہچ ءُ حالیت اسے ٹی سگپنہ۔ ہڑتوم آ ملک آک اوغانستان اٹی امن تون اوار ڈیہہ نا امن و سوگوی کن اسیجا کوشست آتے کاریم اٹ اتنگ آ امنا کرینو۔ ترجمان دفتر خارجہ نا رداٹ وزیر خارجہ مخدوم شاہ محمود قریشی تون چارشنبے نادے آ ایرانی ہم منصب ڈاکٹر جواد ظریف وزارت خارجہ ٹی اوڑدہی کرے۔ ہیت وگپ اٹی ہڑتوم آ کنڈآتا تعلقداری، کثیر الجہتی بشخ آتیٹی ہڑتوم آ کنڈآتا کمکاری ءِ مون آ دننگ، کورونا دینی حالیت آتون اوار تین پہ تینی است خواہی نا باندات آتیا گپ وتران کننگا۔ ہڑتوم آ وزیر خارجہ غاتا نیام اٹ گچین باڈر مینجمنٹ، ہڑتوم آکنڈآتا رابطہ غاتا مون آ دننگ و زائر آتے گچین آسراتی تا فراوانی نا بابت ہم گپ وتران مس۔ ایرانی وزیر خارجہ جم و جوش اٹ بخیر کننگ آ وزیرخارجہ مخدوم شاہ محمود قریشی نا منت واری ءِ ہرفے۔ شاہ محمود قریشی پارے کہ پاکستان و ایران نا نیام اٹ دیرینہ، تاریخی برادرانہ تعلقداری ءِ۔ وزیر خارجہ ایران اٹی کورونا دین انا سوب مروک آ جانی نسخان آ است ہسونی نا درشانی ءِ کرسا، دین انا تالانی ءِ توننگ کن ایرانی حکومت نا گام گیج آتا ستاءِ کرے وپارے کہ پاکستان و ایران ہڑتوم آ کنڈآتا واپار، زرکاری، سیکورٹی و ایلو تین پہ تینی است خواہی نا بشخ آتیٹی ہڑتوم آ کنڈآتا کمکاری ءِ مون آ دننگ کن علاقائی و ایلو اہم فورم تیان فائدہ ہرفنگ کیرہ۔ شاہ محمود قریشی پارے کہ اوغانستان اٹی دیرپا و آخبت امن، ڈیہہ ٹی امن و سوگوی کن بھاز اہمیت تخک۔ بین الاوغان مذاکرات نا حالیت اٹ اوغان سرکڑدہ غاتون قیام امن کن اسہ جوان ءُ موقع اس ارے ہرادے ہچ ءُ حالیت اسے ٹی دوتیان پیش تمنگ کن ہلنگپ۔ ہڑتوم آ وزیر خارجہ غاتا اوغانستان اٹی امن تون اوار ڈیہہ نا امن و سوگوی کن اسیجا کوشست آتے کاریم اٹ اتنگ آ امنا کریر۔ وزیر خارجہ تینا ایرانی ہم منصب ءِ مقبوضہ جموںو کشمیر اٹی برجا بھارتی بیدادی و انسانی حق انا بھلا خلاف ورزی تیان معلومدار کرے۔ وزیر خارجہ پاکستانی الس نا کنڈآن، مظلوم کشمیری تا مخ تفی آ، ایران نا سپریم لیڈر علی خامنہ ای ءِ خراج تحسین پیش کرے۔
