اسلام آباد۔ 11 نومبر (اے پی پی) صدر مملکت ڈاکٹر عارف علوی بزنس کمیونٹی آ زور شاغانے کہ او خراج آتا دیانتداری اٹ ادائیگی و خراج دُزی نا توننگ ءِ پک کننگ اٹ کڑد ادا کیر۔ مثبت زرگزرانی ٹک آتون پاکستان شونداری نا کنڈآ ہِننگ ءِ، ساڑی حکومت نا پالیسی تا سوب آن پاکستان علامہ محمد اقبال نا ویژن نا رداٹ مسلم امہ نا کماشی ءِ کیک و دنیا ٹی اہم ءُ ملک اس مرسا مون آ بریک، ملکی شونداری کن جان جوڑی و تعلیم نا بریبر وارخواہی تیان ملک ءِ شونداری نا کنڈآ دننگ مریک، کاروباری بشخ اٹی زالبول و خصوصی بندغ آتا ہم است بڈی ءِ کننگے۔ داخیال آتا درشانی ءِ او چارشنبے نادے آ آئی سی ایم اے نا کانووکیشن 2020 ء آن تران کرسا کرے۔ صدر مملکت پارے کہ پدریسہ یات دہانی کرفنگ اُٹ کہ کورونا دین انا ارٹ میکر ریسہ برجاءِ۔ دین انا تالانی ءِ توننگ کن رکھی گام گیج آتیا عمل کننگ المی ءِ۔ کورونا نا دین انا اولیکو ریسہ ٹی میڈیا آگاہی فراوان کرے۔ مخلوق رکھی گام گیج آتیا عمل کیر۔ عالم دینک مسیت آتیٹی کورونا ایس او پی تیا عملدرآمد ءِ پک کیر۔ اوپارے کہ گریجویٹ ورناک پوسکن آ عزم اتون میدان اٹ دڑنگ انگ ءُ۔ دا ورنا تا لمہ و باوہ، استاد، راج و ملک اوفتے دا ہند آ سرکننگ اٹ اہم کڑد ادا کریر۔ داسہ دا ورناتا فرض ءِ کہ او نادار تپہ غاتا خیال ءِ تخر۔ دا ورناتا کاروباری ادارہ غاتا مالی باندات آتا جاچ ءِ ہلنگ اٹ اہم کڑد اس مریک۔ اومیت ءِ دا امانت و دیانتداری اٹ تینا کاریم ءِ کیرہ۔ اوپارے کہ ہر کاروبار ءِ بناکننگ کن کیہی سوب آتے مون آ تخوئی مریک ہرافتے ٹی کاروباری کٹیا آخبت اٹ چاگڑد آ اثر و بروک آ چین تیکن دانا فائدہ غاتے مون آ تخنگک۔ 60 انا دہائی ٹی ملک اٹی کرپشن و ناروا کٹیا خوری ءِ مون آ دننگا۔ صدر مملکت پارے کہ دنیا نا اسہ درسد مخلوق دنیا نا 60 درسد آن زیات دولت آ کوزہ گیر ءُ۔ اوپارے کہ کورونا نا دین اٹی انفارمیشن ٹیکنالوجی نا کمک اٹ مر مر انگا علاقہ غاتیٹی تعلیم فراوان کننگا۔ فاصلاتی وڑاٹ تعلیم فراوان کننگ آن تعلیم نا وارخواہیک ودرہ، و خڑچ آک کم مریرہ۔ اوپارے کہ ملک آن ایلیٹ ازم ءِ چٹفوئی مریک۔ پاکستان داڑآ روان ءِ۔ اوپارے کہ کورونا دین اٹی احساس پروگرام و سخی تا کمک اٹ نادرا تپہ غاتا کمک ءِ کننگا۔ حکومت 50 ہزار اسکالر شپ تس۔ اوپارے کہ تعلیم و جان جوڑی نا آسراتی تسکان ہر بندغ نا رسینگ المی ءِ۔ داڑآن راج شون ہلیک۔ ساڑی حکومت شاری تا ہیلتھ انشورنس نا بناءِ کرینے۔ اوپارے کہ انفارمیشن ٹیکنالوجی نا بشک اٹی مصنوعی ذہانت نا کمک اٹ ڈیٹا ءِ یکجا کننگ مریک۔ پاکستان اٹی ورناتیان بھلو اومیت اس گنڈوک ءِ۔ ڈاکٹر عارف علوی پارے کہ شاعر مشرق ڈاکٹر علامہ محمد اقبال ءِ پیشن نا ملک تعلیم اٹی احساس مس کہ مسلمان زوال پذیر ءُ۔ صنعتی انقلاب اٹ پدی سلیسنو۔ ہندوستان اٹی اوفتے تون اقلیت آتیانبار سلوک کننگک۔ ودا رداٹ دوقومی نظریہ ءِ پیش کرے۔
