اسلام آباد۔10نومبر (اے پی پی): مزن وزیر عمران خان ءَگوں شنگھائی کمک تنظیم (ایس سی او) ءِ جوانی ءُ سوبمندی ءِ ھاترءَ 6 نکاتی پروگرام ءِ سرءُ سوج پیش کتگ ءُ گشتگ کہ کورونا وائرس ءِ جاورھال ءَ را گرءُ دار کنگ ءِ ھاترءَ یکجائی کوشستانی ضلورت اِنت، اے ہوپ ءَ را گرءُدر کنگ ءِ ھاترءَ میاں اوستمانی ادارگ ءُ جی ۔20 ملک آں دیمروئی کتگیں ملک آنی کمک کنگ لوٹ ایت، سرجمیں دنیا ءِ معیشت سستی ءَ گوں رہادگ اِنت، درشان ءِ آجوہی ءِ پُشت ءَ مذہب ءِ بے شرپی سگ ءُ اوپار کنگ نہ بیت۔ ماحولیاتی آلودگی ءِہلاس کنگ ءِ ھاترءَ پاکستان وتی کردءَ پیلو کنگ ء َ اِنت، اوگانستان ءَ محکمیں امنءُ ایمنی ءِ ھاترءَ درائیں فریق آں وتی کرد پیلو کنگ لوٹ ایت، اقوام متحدہ ءَ را اے جیڑہ ءُ جنجالاں گیشءُ گیوار کنگءِ ھاترءَ کوشست کنگ لوٹ ایت۔ اے ھیالانی درشانی آئی ءَسے شمبے ءِ روچءَ شنگھائی کمک تنظیم ءِ سروک حکومت ءِ کونسل ءِ دیوان ءَ گوں ویڈیو لنکءِ وسیلگ ءَچہ تران کنان ءَ کتگ۔ مزن وزیر عمران خان ءَگشتگ کہ دنیاءَ کورونا وائرس ءِ ہوپ ءَ چہ پنچ کروڑءَ چہ گیش مردم آماچ بوتگ۔ کوویڈ۔19 ءَ سرجمیں دنیا ءِ معیشت ءَ را تباہ کتگ۔ آئی ءَ گشتگ کہ اوگانستان ءَ محکمیں امنءُ ایمنی ءِ ھاترءَ درائیں فریق آں وتی کرد پیلو کنگ لوٹ ایت۔ آئی ءَ گشتگ کہ اے وہد ءَ دنیا ءَ را مذہبی وت مہ وتی ءِ ضلورت اِنت۔ درشانی ءِ آجوہی ءِ پُشت ءَ کجام ہم مذہب ءِ بے شرپی سگءُ اوپار کنگ نہ بیت۔ آئی ءَ گشتگ کہ پاکستان ءَ ناشرکاری ءِ ھلاپ ءَ جزم کتگ، چاگرد ءِ نیزگاریں مردماں ریلیف دیئگ ءِ سرءَ دلگوشی کنگ بوہگ ءَ اِنت، ما کورونا وائرس ءِ ہوپ ءَ را گرءُ دار کنگ ءِ ھاترءَ سمارٹ لاک ڈاؤن ءُ پہ نیزگاریں تبکانی کمک ءِ ھاترءَ گامگیج کتگ۔ مزن وزیر ءَگشتگ کہ پاکستان ءَ را ایس سی او ءِیوتھ کونسل ءِ باسک گچین بوہگ ءَ مارا وشی اِنت چیا کہ پاکستان ءِ گیش آباتی ورناہ آنی اِنت، کورونا وائرس ءِ اثراں چہ رکگ ءِ ھاترءَ ایس سی او نالج بینک جوڑ کنگ ءُ معیشت ءِ سرءَ کورونا ءِ اثرآنی گرءُ دار ، کسانیں ، درنیامی ءُ دراج بُریں حکمت عملی ءِ تیاری، کورونا وائرس ء َ چہ رکگ ءِ ھاترءَ ارزانیں ءُ ہرکس ءَ دست کپوکیں ریکسین ءِ تیاری ءِ ھاترءَ یکجاہ تپاکی، نیزگاری، نادراہی، نیزگاریءُ شودیکی ءِ ہلاس ءُ محکمیں دیمروئی ء َ ہوار ڈنی ملک ءَ آف شور اکاؤنٹ ءَ غیر قانودی سرکنگ ءِ گرءُدار ءُموسمیاتی مٹءُبدلی ءِ ھترہ ءَ را گرءُ دار کنگ ءِ ھاترءَ سرجمءَ گامگیج کنگ بہ بنت۔
