اسلام آباد۔10نومبر (اے پی پی): بنجاھی کابینہ ءَ سرجمیں ملک ءَ کورونا وائرس ءِ پازیٹیو کیسز ءُ مردم آنی گیشاں چہ گیش بیران بوھگ ءِ پد ءَ الس آں گوں دستبندی کتگ کہ کوویڈ 19 یک ٹوھیں نادراھی ات، ماسک ءِ کارمردی ءُ ایس او پیز آنی پد ءُ رند ءَ گوں ایشرا شکست دیگ بوت کنت، روزگار ءُ کاروباری کار آں ابید کورونا وائرس ءِ شنگ ءُ تالانی ءِ سبب جوڑ بوھوکیں شوبگ آنا بھر بھر آنی تہ ءَ بندش جنگ بیت، حکومت ھم اے ساھت ءَ اچ السی مچی نہ کنت، بنجاھی کابینہ ءَ گریب ءُ بزگریں مردم آناں گہتریں ریلیف دیگ ءِ واستہ 4 ٹریلین ءِ سبسڈی آناں جوان جوڑ کنان ءَ ٹارگٹڈ سبسڈی توسیپ کنائینگ، گندم ءِ آیوکیں کشار ءِ کمکی نیاد 1652 کلدار یک من 40 کلو گرام گیشینگ ءُ سعودی عرب حکومت ءِ نیمگ ءَ شور ءُ مشور کتگیں ڈیجیٹل کوآرگنائزیشن ءِ جوڑیشت ءِ منظوری داتگ۔ بنجاھی وزیر اھوالکاری ءُ شنگ کاری سینیٹر شبلی فراز ءَ مزن وزیر عمران خان ءِ سروکی ءَ بنجاھی کابینہ ءِ دیوان ءَ چہ پد میڈیا ءَ را بریفنگ دیان ءَ گوشت کہ کابینہ ءَ ھاسیں کمکار ڈاکٹر مسعود ءَ بینہ ءَ را سبسڈی ءُ گرانٹس ءِ کار رپک ءَ را جوان جوڑ کنگ ءِ بابت ءَ بریفنگ دات۔ کابینہ ءَ را گوستگیں 13 سال ءِ ھرچ ءُ درچ، سبسڈی ءُ گرانٹس ءِ معاشی چار ءُ بچاری کاگد پیش کت انت۔ مزن وزیر ءَ پنت ءُ شون کت کہ توامیں شوبگ آنی سر ءَ سرجمیں چار ءُ بچار گرگ بہ بیت ایشانی تہ ءَ گریب ءُ پشت کپتگیں دمگ آناں ٹارگٹڈ سبسڈی دیگ بوت کنت ۔ آئی ءَ گوشت کہ ھمے وڑ ءَ اولی بھر ءَ مزن وزیر عمران خان ءِ ویژن ءِ رد ءَ گہتریں انتظامی آنی وسیلگ ءَ کوویڈ 19 ءَ را شکست دیگ بوتگ ھمے وڑ ءَ دومی فیز ءَ ھم ھمے رنگ ءَ گامگیج کنگ بیت۔ یک جستے ءِ پسو ءَ آئی ءَ گوشت کہ نوکیں آیوکیں گندم ءِ نیاد آنی گیشینگ ءِ مستری بنجاھی حکومت ایگ انت، صوبگ ایوک ءَ وتی واھشت آنی درشان ءِ کت کنت، حکومت ءَ الس ءَ را ریلیف دیگ ءِ واستہ گندم ءِ نیاد 1650 کلدار گیشینگ بوتگ ایشی ءِ تہ ءَ 100 کلدار دھکان آناں سبسڈی ھم ایر کنگ بوتگ۔
