اسلام آباد۔ 10 نومبر (اے پی پی) چیئرمین کشمیر کمیٹی شہریار آفریدی پارینے کہ ڈیہہ ٹی امن کشمیری تا حق آن بیدس ممکن مننگ کپک، کشمیر نا بابت غٹ پاکستانیک قائد اعظم محمد علی جناح نا وژن آن پدی مننگ کپسہ۔ جہانی دنی اءِ ڈیہہ نا امن نا احساس ءِ کروئی مریک۔ او انٹرنیشنل کشمیر کانفرنس آن تران کریکہ۔ چیئرمین کشمیر کمیٹی شہریار خان آفریدی پارے کہ پاکستانی حکومت و الس زموار ءُ، پاکستان کشمیری تا توار مرسا کیک، بھارت نا 5 اگست 2019 نا لاک ڈاؤن آن پد مچ آ دنیا ہموفتے خنا ہراوخت اس ہم متویسس۔ اوپارے کہ بھارتی فوج کشمیری مسن تتون ریپ کرے، ہر وڑنا بیدادی آن پد ہم کشمیریک پاکستانی جھنڈا ٹی تینا شہید آتے جہہ جاگہ کیرہ۔ اوپارے کہ مقبوضہ کشمیر اٹی رہینگوک آک ہم بریبر حق اناحقدار ءُ۔ مقبوضہ کشمیر اٹی رہینگوک آ ہموخس اہم ءِ اخس کہ شون ہلوک ملک آتیٹی رہینگوک آ، کشمیری تے اوار کننگ آن بیدس دا ویل ایسر مفک۔ اوپارے کہ بھارت دیکی میڈیا ٹی 10 لکھ ڈالر پروپیگنڈآ غا خلیک۔ ورلڈ کشمیر فورم نا چیئرمین رفیق پردیسی پارے کہ یورپ انسانی حق اکن سرگرم سلک تو بھارت بیدادی نا برخلاف ہم مون آ برے، نن کشمیر موومنٹ ءِ آخیریکو حد اسکان دینہ، اوپارے کہ ورلڈ کشمیر فورم بھارتی بیدادی ءِ دنیا ءِ نشان ترسا کیک۔
