اسلام آباد۔ 10 نومبر (اے پی پی) وزیراعظم نا خصوصی کمکار سی ڈی اے امور علی نواز اعوان تون سی ڈی اے مزور یونین نا ڈل سے شنبے نادے آ اوڑدہی کرے۔ سی ڈی اے ڈل اٹی اوار چوہدری محمد یاسین، اورنگزیب خان، راجہ شاکر زمان کیانی، صوفی محمود علی، سردار محمد آصف، راجہ رئیس، مرزا سعید، چوہدری زاہد احمد، مرزا شفیق اوار ئسر۔ ڈل خصوصی کمکار تون اونا دفتر اٹی اوڑدہی کریر، ڈل سی ڈی اے ٹی کاریم کروک آ ڈیلی ویجز، کنٹریکٹ و مسٹر رول ملازم آتا آخبتی و انوائرمنٹ ملازم آتا ویل آتون اوار ایلو باندات آتیا سرجم گپ وتران کریر، مزور یونین نا قائد چوہدری محمد یاسین پارے کہ نن چیئرمین سی ڈی اے عامر علی احمد نا کنڈآن اسلام آباد شار انا گچینی کن چست کروک آ گام گیج آتے خراج تحسین پیش کینہ انتئے کہ اونا کوشست آتے اٹ اسہ وار ولدا اسلام آباد نا زیبائی ترندی اٹ بحال مننگ ءِ۔ اوپارے کہ ننا خواست ءِ کہ سی ڈی اے ٹی کاریم کروک آ غٹ ڈیلی ویجز، کنٹریکٹ و مسٹر رول ملازم آتے سی ڈی اے مزور یونین نا اتنظامیہ غان پک مروک معاہدہ و ساڑی آ عدالتی فیصلہ غاتے مون آ تخسا دمدستی وڑاٹ ریگولر کننگے۔ چیئرمین سی ڈی اے نا پارت آ اسلام آباد شار انا گچینی کن انواءرمنٹ، سٹریٹ لائیٹ، سینی ٹیشن، واٹر سپلائی، روڈ ڈائریکٹوریٹ و ایلو اسٹاف دے و نن پورو لگن و چکار اتون تینا خذمت آتے سرتننگ ءُ۔
