اسلام آباد۔ 10 نومبر (اے پی پی) بنجائی وزیر سائنس و ٹیکنالوجی چوہدری فواد حسین پارینے کہ سائنس ننا زند انا وڑاتون اوار مچ آ دنیا ءِ بدل کرینے۔ سائنس و تعلیمی ادارہ غاک ملک اٹی سائنس و ٹیکنالوجی ءِ مون آ دننگ اٹ کڑد ادا کیر، دنیا نا آخبت نا دارومدار سائنس و ٹیکنالوجی ٹی پیش رفت آٹے۔ دا سیکٹر اٹی زالبول و مسن تا اوار مننگ المی ءِ۔ او سے شنبے نادے آ سائنس نا جہانی دے انا وخت آ پاکستان سائنس فاؤنڈیشن، یونیسکو و کامسیٹس و پاکستان اکیڈمی آف سائنس نا شریداری اٹ کومسٹیک سیکرٹریٹ اٹی اڈ ہلوک آ دود آن تران کریکہ۔ ملک انا آخبت سائنس نا شونداری تون گنڈوک ءِ، اگہ ننے پاکستان ءِ شون ہلوک ملک آتا صف اٹ سلفوئی ءِ تو ننا چناتے سائنس نا کنڈآ بروئی مریک۔ ننتون وسیلہ غاتا ہم کمتی اف، ملک اٹی ورنا چین ءِ انٹرنیٹ تون اوار چندی آسودہی دوئی ءِ، ہرافتے کاریم اٹ اتسا سائنس و ٹیکنالوجی نا پوسکن آ علم آن فائدہ ہرفنگ مریک۔ آخبت اٹ ہمو ملک آک مون آ کارہ ہرافتا آخبت علم، تعلیم و سائنس و ٹیکنالوجی تون گنڈوک ءِ۔ فواد چوہدری بھلا واکدار آتیان خواست کرے کہ ویکسین آ اجارہ داری اس جوڑ کننگپ و اودے اسہ ملک اسسکان محدود کننگپ۔ امیر ملک آک 0.5 ارب ویکسین نا آرڈر تسنو۔ اگہ دا امیر ملک آک ویکسین ءِ ہلیر تو پدتموک ملک آک داڑآن محروم مریرہ، ہرا سائنس و ٹیکنالوجی آ اجارہ داری آنبار مریک۔ فواد چوہدری پارے کہ نن کیہی چیلنج آتا مقابلہ ءِ کرینن و داوخت آ ہم کورونا نا سوب آن مشکل آتا گواچی اُن، ولے ہراتم اولیکو کورونا نا کیس مون آ بس تو پنچ تُو اسکان نن چین آن طبی گڑا درآمد کرین۔ ولے ننا سائنسدان تا دے و نن نا کوشست آتے اٹ پاکستان داسہ تینا ماسک، سینیٹائزرو وینٹی لیٹر چندی ملک آتے برآمد کننگ ءِ۔ فواد چوہدری نا پاننگ ئس کہ بھاز زوت فائیو جی ٹیکنالوجی آن انقلاب بریک۔ دود آن سیکرٹری جنرل پاکستان اکیڈمی آف سائنس ڈاکٹر اسلم بیگ، پاکستان سائنس فاؤنڈیشن نا باسک مرزا حبیب علی، صدر ای سی او سائنس فاؤنڈیشن ڈاکٹر منظور سومرو، ڈائریکٹر یونیسکو پیٹریسیامیک فلپ و ڈاکٹر ضابطہ خان شینواری ئسک تران کریر۔ ترانکاری آک راج اکن سائنس انا کڑد و سائنس انا آخبت، ورناچین اکن سائنس و ٹیکنالوجی تعلیم نا اہمیت۔ سائنسدان، حکومت و شاری تا نیام اٹ ڈائیلاگ نا گچینی و جہانی سائنٹفک کمکاری نا بابت باندات آتے تالان کریر۔
