اسلام آباد۔ 10 نومبر (اے پی پی) آئل اینڈ گیس کمپنی لمیٹڈ(اوجی ڈی سی ایل) نا چندی آئل فیلڈ آن اینخو مالی سال انا اولیکو سہ ماہی ٹی ہڑدے ئی 3622 بیرل تیل و 904 ایم ایم سی ایف ڈی گیس انا پیدوار دوئی مسنے وخت اس کہ تدوک آ مالی سال انا ہندا وخت اٹی تیل انا پیداوار 37560بیرل ہڑدے ئی و 960 ایم ایم سی ایف ڈی گیس دوئی کننگاسس۔ کمپنی حوالی نا رداٹ اینخو مالی سال انا اولیکو سہ ماہی ٹی 714 ٹن ہڑدے ئی مس وخت اس کہ تدوک آ مالی سال انا ہندا وخت اٹی ایل پی جی ہڑدے ئی پیداوار 702 ٹن ئس۔ ملک انا تیل انا جم پیدوار اٹی اوجی ڈی سی ایل نا 47 درسد، گیس انا پیدوار اٹی 29 درسد و ایل پی جی نا پیداوار اٹی 36 درسد ءِ۔ اوجی ڈی سی ایل اینخو مالی سال اٹی اِرا پین دُون تیان تیل و گیس انا پیدوار سسٹم اٹی اوار کرینے۔ اینخو مالی سال انا اولیکو سہ ماہی ٹی کمپنی جونا1، شین ڈنڈ1، نانگ پیر1 و قادر پور 62 تون وار 4 پوسکن آ ہند آتیا ڈرلنگ کرینے وخت اس کہ 7 دُون تیٹی ڈرلنگ و ٹیسٹنگ نا عمل ءِ ہم پورو کرے۔ اوجی ڈی سی ایل خام ملکی تیل و گیس انا پیدوار نا بشخ اٹی غٹ آن زیات ہائیڈرو کاربن نا کوڑی تا خننگ تون بھلو کچ اسے آ زرکاری کننگ ءِ و تیل و گیس انا پٹنگ نا جم اٹنگا علاقہ نا 37 درسد داوخت آ اوجی ڈی سی ایل تون ءِ۔ کورونا دین انا حالیت آتا سوب آن جہانی کہول آ تیل انا نہاد آتیٹی کمتی آن پد ہم اینخو مالی سال اٹی اوجی ڈی سی ایل نا ریونیو 59 ارب 52 کروڑ روپئی آن زیات رہینگانے ہراکہ تدوک آ مالی سال انا ہندا وخت اٹی 66 ارب 20 کروڑ 40 لکھ روپئی ئس۔
