اسلام آباد۔ 10 نومبر (اے پی پی) ’’زینب الرٹ‘‘ شاری تے پاکستان سٹیزن پورٹل آ ملک اٹی بے گواہ چناتا حوال تننگ نا اسہ آسان و گچین ءُ ایسر اس فراوان کرینے۔ وزارت انسانی حق انا رداٹ زینب الرٹ نا کمک اٹ ہندی کمامدارآتے بے گواہ چناتا بابت دمدستی گام گیج کننگ اٹ کمک رسینگک۔ وزارت انسانی حق زینب الرٹ نا بارواٹی اسہ ویڈیو ٹیوٹوریل اس ہم جاری کرینے ہراٹی زینب الرٹ نا کاریم اٹ اتنگ نا وڑوڈول آن سرجمی اٹ معلومدار کننگانے۔ پرائم منسٹر ڈیلیوری یونٹ نا کنڈآن دا ایپ ءِ دا وڑاٹ تیار کننگانے کہ دا ہر شاری ءِ باآسانی تعلقدار ادارہ غاتون منسلک کننگ کے۔ دا ایپ انا بنداوی مسخت بے گوا چنایا بیدادی، زیاتی نا گواچی چناتا واقعہ غاتے رپورٹ کننگ اٹ آسراتی فراوان کننگ ءِ۔ دا ایپ اٹ ہمو غٹ فیچر آتے درستی راستی کرفنگانے ہرافتا کمک اٹ شاری تینا و چنانا بابت معلومداری ایپ اٹ شاغنگ کیک۔ اگہ شاری اس جند انا حیثیت اٹ واقعہ اس رپورٹ کرفنگ خوائے تو اودے ہروڑنا دستیاب معلومداری داٹی فراوان کروئی مریک ہراٹی چنانا پن، وئی، رنگ و دروشم پین پین غٹ ءِ تروئی مریک۔ دا ایپ اٹی ودکی معلومداری کن اسہ خانہ اس تننگا تانکہ زیات آن زیات معلومداری فراوان کننگ مرے۔ داکان بیدس اگہ شاری اس راجی زمواری ءِ پورو کرسا کیس اسے رپورٹ یا اونا معلومداری تننگ خوائے تو او ایپ اٹ تروک آ آپشن’’راجی زمواری‘‘ آ کلک کرسا معلومداری نوشتہ کننگ کیک۔ زینب الرٹ ایپ اٹ ہرشار انا اسہ لسٹ اس تننگانے ہراٹی ہر کیس انا بابت معلومداری ہم نوشتہ ءِ۔ داکان بیدس دا ایپ اٹ سوشل میڈیا غا شیئرنگ نا آپشن ہم ساڑی ءِ تانکہ ب گوا چناتے ءِ پٹنگ اٹ کمک رسینگ کے۔ داکان بیدس وزارت انسانی حق تینا آگاہی پروگرام نا رداٹ راج اٹ چناتا حق انا رکھ انا شعور بیدار کننگ کن بنجائی دارالحکومت اسلام آباد اٹی چائلڈ پروٹیکشن کمیٹی تے اختہ کرینے، دا کمیٹیک راجی آگاہی کن چندی سیشن اڈتننگ ءُ تانکہ چناتے راجی رویہ و استحصال آن بچفنگ مرے۔ تدوک آ دے زینب الرٹ نا بارواٹی اسہ آگاہی سیشن اس بنجائی دارالحکومت نا نواحی علاقہ سوہان اٹی اڈ ہلک ہراٹی مخلوق ءِ زینب الرٹ نا کاریم اٹ اتنگ و واقعہ رپورٹ مننگ آن پد کارروائی نا بابت معلومدار کننگا۔ وزارت انسانی حق انا رداٹ دا سیشن تا کمک اٹ چنا، لمہ و باوہ، استاد، و سول سوسائٹی نا نمائندہ و راج انا ایلو تپہ غاتیان تعلق تخوک آ سرگرم کارندہ غاتے چناتا حق، ساڑی کانود آ عملدرآمد و راج آن منفی رویہ غاتا چٹفنگ کن کروک آ گام گیج آتا بابت معلومدار ہم کننگ انگ ءِ و چندی تپہ غاتا اوار مننگ نا کمک اٹ حالیت آتیٹی گچینی کن اواری اٹ کوشست آتا گرج آ زور شاغنگک۔ وزارت انسانی حق دا رداٹ داتم اسکان چندی آگاہی سیشن اڈتسنے ہرافتے ٹی حقوق اطفال نا رکھ انا کمیٹی تا کمک اٹ بنجائی دارالحکومت اسلام آباد نا نواحی علاقہ، سوہان، بری امام، سیدپو، ترنول، گولڑہ، شاہ اللہ دتہ و 26 نمبر چونگی ٹی 5 آگاہی سیشن اڈتننگا تانکہ دا علاقہ غاتا رہینگوک آتے چناتا حق و راجی رویہ غاتا بابت آگاہی تننگ مرے۔ شعور بیداری نا دا سیشن تا بشخ ہلوک آتے آئین پاکستان اٹ چناتے تروک آ حق اتون اوار اوار ساڑی ہی ٹی منظور کروک آ زینب الرٹ ایکٹ کون آ کانود جوڑ کننگ و چناتتون جبری مشقت نا چٹفنگ، چناتا اُرائی ملازمت نا چٹفنگ نا بابت روزگار ایکٹ۔ 1991 ٹی ترمیم کون آ کانود آتا بابت آگاہی فراوان کننگا۔ بشخ ہلوک آتے مفت ہیلپ لائن نمبر 1099 نا بابت معلومدار کننگا ہرانا کمک اٹ داوڑنا واقعہ غاتے دمدستی رپورٹ کننگ ممکن مریک و زہمی خاہوت آتے وزارت انسانی حق انا کنڈآن مفت کانودی کمک نا دوئی کننگ اٹ کمک رسینگک۔
