اسلام آباد۔ 6 نومبر (اے پی پی) بنجاہی حکومت اسلام آباد ءَ 10 روچی نماش “لوک ورثہ ” ءَ وتی دراہیں جلواناکیاں گوں بندات بوتگ۔ نماش ءَ چاریں صوبہ آں ہوار گلگت بلتستان ءُ کشمیر ءِ دود ءُ ربیدگ ءَ را پدر کنگ ءِ ھاترءَ اسٹال سمبائنگ بوتگ اَنت۔ ہمک دمگ ءِ اِزم کاراں وتی ازم ءِدرشانی کتگءُ نماش ءَ را جلواہ ناک کتگ کہ آئی ءِ تہ ءَ گوں بلوچستان ءَ سیادی داروکیں ازمکاراں بلوچی لیوا ءُ اتڑ کتگ۔ ایشی ءَ ابید بلوچستان پویلین ءَ بلوچی دود ءُ ربیدگ ءَ را پدر کنگ ءِ ھاترءَ اسٹال جوڑ کنگ بوتگ اَنت، کہ آئی ءِ تہ ءَ بلوچی دوچ، پیش ءِ سرءَ جوڑ بوتگیں سامان ، دمبورگ ءُ سروز، بلوچی چوٹ، بلوچی گدان ہوار بوتگ۔ بلوچی دود ءُ ربیدگ ءَ را گوں جوانی ءَ پدر کنگ ءُ دیمروئی دیئگ ءِ ھاترءَ سرجمیں بلوچستان ءَ چہ ازمکار ءُ شاہوکاریں توار کنگ ءُ آیانی ازم پیش دارگ بوتگ۔ پنجگور بلوچستان ءَ چہ سیادی داروکیں حمید احمد کہ کوہی پیشاں چہ ضلورت ءِ سامان جوڑ کنت، گشیت کہ منءَ بیست سال بیت کہ من کوہی پیش ءَ چہ سامان جوڑ کناں کہ آئی ءِ تہ ءَ تور، کپات، کُلا، کاشی، روپگ، بزبانی، پتراکی، مُسلاءُ تگرد ہوار اَنت۔ آ گیش گشیت کہ اے یک جوانیں اِزم اِت بلےاے ازم وہد ءِ گوما بیگواہ بوہان اِنت ءُ مے ورناہیں نسل ایشی ءَ چہ ناسرپد اَنت ،آئی ءَ گشتگ کہ لوک ورثہ ءِ ھمک سالی نماش ءَ مے ورناہ ایشی ءَ چہ سرپد بنت۔ ایشی ءَ ابید بلوچستان ءِ دستی دوچانی اسٹال ءِ سرءَ مردمانی رش بوتگ ، چیا کہ اے دمگ ءِ دستی دوچ باز نامدار اَنت، آئی ءِ حاسیں سبب اِیش اِنت کہ اے درائیں دوچ حاس دست ءِ سرءَ دوچگ بنت ءُ وتی جتاہیں ترز ءُ بندیکانی سبب ءَ باز نامدار اَنت۔ اے ہوالگ ءَ بلوچی دستی دوچ ءِ اسٹال ءِ واہُند بانک کنیز فاطمہ مینگل ءَ گشتگ کہ آ ہمک سال بنجاہی حکومت اسلام آباد ءَ بلوچستان پویلین ءَ بلوچی دوچ ءِ اسٹال جنت ءُ بلوچی دوچ ءِ نماش ءَ کنت، آئی ءَگشت کہ بلوچی دوچ باز نامدار اِنت ۔ یک جستے ءِ پسو ءَ آئی ءَگشت کہ بلوچی دوچ ءِ نیاد ہمے ھاترءَ باز اَنت چیا کہ اے باز ہُرت ءُ محنت ءِ کار اِنت، اے درائیں کار دست ءِ سرءَ بنت ءُ سُہچن ءِ سرءَ بیت ءُ اے کارءَ وہد لگ ایت۔ یک سوٹے ماہے جنت۔ پہ ہمے ھاترءَ ایشی ءِ نیاد گران اَنت ۔ اسٹال ءِ واہنداں گشتگ کہ اسٹال جوڑ کنگ ءِ مول ءُ مراد وتی صوبہ ءِ دود ءُ ربیدگ ءَ را دنیا ءَ را پیش دارگ اِنت ءُ سرپدی دیئگ اِنت۔ تنکہ مے ورناہیں نسل وتی دود ءُ ربیدگ ءَ پجار بیاریت۔ لوک میلہ ءَ مردماں اسٹال ءُ ازمکارانی اِزم ءَ را باز دوست کتگ ءُ وشی ءِ درشانی کتگءُ آیاں گشتگ کہ یکیں جاہ ءَ دراہیں کلچرآنی یکجاہ بوہگ مے وش بھتی اِنت کہ مارا یک وہد ءَ دراہیں دود ءُ ربیدگ گندگ بنت ءُ آیانی باروا زانگ ءِ موہ رسیت۔ آیاں گشتگ کہ اے لوک میلہ سرجمیں دنیا ءَ پاکستانی کلچر ءَ را دیما برگ ءُ پجار کنگ ءِ وسیلگ اِنت۔ ایشی ءَ ابید لوک میلہ ءَ کورونا ءَ را گرءُ دار کنگ ءُ شنگ بوہگ ءَ چہ دارگ ءِ ھاترءَ ایس او پیز ءِ حاس ھیال داری کنگ بوتگ ءُ اے ہوالگ ءَ ٹائیگر فورس تعینات کنگ بوتگ۔
