اسلام آباد۔ 09 نومبر (اے پی پی) وزیراعظم عمران خان ملک و قوم ءِ مون تروک ویل آتا ایسر اس پٹنگ کن علامہ اقبال نا فکرآتیان راہشونی دوئی کننگ نا گرج آ زور شاغانے۔ تانکہ ملک ءِ اسلامی فلاحی ریاست اسے ٹی بدل کننگ مرے۔ 9 نومبر آ علامہ اقبال نا ودی دے انا وخت آ تینا اسہ کلہو اسے ٹی وزیراعظم پارے کہ دا ننا انفرادی و قومی زمواری ءِ کہ علامہ اقبال نا فکر آتیا عمل کرسا قوم انا جوڑ کننگ اٹ تینا کڑد ءِ ادا کین۔ وزیراعظم پارے کہ علامہ اقبال تینا خیالات و شاعری نا کمک اٹ ہمووخت آ برصغیر نا مسلمان تا راہشونی نا فیصلہ ءِ کرے ہراتم او تینا درستی و راستی نا پٹنگ اٹی غلامی نا تہاری تیٹی اختہ ئسر۔ اومستی پارے کہ علامہ اقبال تینا شاعری اٹ دا وڑاٹ مسلمان تے بیدار کرے ہرانا کمک اٹ برصغیر نا مسلمان تے مایوسی نا احساس آن بیدار مننگ و ناممکن آتے ممکن کننگ اٹ پبی راہشونی دوئی مس۔ پریس ریلیز نا رداٹ وزیراعظم کلہو اٹی مستی پارے کہ علامہ اقبال نئے بیرہ پاکستان ناتغ ءِ خنا بلکن پاکستان نا جوڑ مننگ آن پد پیش بروک آ ویل آتاہم پیدواری ءِ کریسس۔ اومستی پارے کہ دااونا شخصیت نا دوراندیشی ئس کہ او بھاز سال مہالو ننے مون تروک ساڑی آ ویل آتا پیدواری ءِ کریسس۔ وزیراعظم پارے کہ فرقہ واریت و انتہاپسندی کون آ ویل آتا مون ءِ توننگ کن اقبال نا وژن داسہ ہم ننکن کسر نا ڈیواءِ۔ وزیراعظم خصوصی وڑاٹ ورناچین ہرافتے اقبال شاہین اٹ تعبیر کریسس ءِ پنت و شون کرے کہ او تینا فطری لائخی تے کاریم اٹ اتیر ہرافتا کمک اٹ او دنیا ٹی تینا ہند اس دوئی کننگ کیرہ۔ اوقوم آ زور شاغا کہ تینا سرکڑدہ غاتا افکار اٹی پاکستان ءِ شاغنگ نا کنڈآ تینا غٹ تر توانائی سیاسی، راجی و زرگزرانی ادارہ غاتا اول سرآن ٹہیفنگ آ چکار کیر۔
