خپلو۔ 09 نومبر (اے پی پی) بنجائی وزیر مواصلات و پوسٹل سروسز مراد سعید پارینے کہ پی ٹی آئی الس نا کمک اٹ گلگت بلتستان اٹی ہم حکومت کیک، پی ٹی آئی حکومت مفت درمان نا آسراتی نا پروگرام نا بناءِ کرے، گلگت بلتستان نا الس ءِ آئینی حق انا فراوانی کن عملی گام گیج کرینے، اقتصادی راہداری ٹی گلگت بلتستان نا بھاز اہم ءُ ہند اسے۔ دوشنبے نادے آ گلگت بلتستان اٹی خپلو نا ہند آ السی مچی آن تران کرسا بنجائی وزیر پارے کہ بدبختی اٹ مستین نا حکومت آک گلگت بلتستان نا شونداری آ چکار کتوس۔ الس ءِ غٹ یات ءِ کہ ملکی دولت ءِ ہراسٹ پُلا، پلوک آ دولت ءِ پدی تروئی مریک۔ کرپٹ زموار آک گلگت بلتستان ءِ ہم الیتوس۔ اوپارے کہ وزیراعظم عمران خان نا کماشی ٹی علاقہ نا ویل آتے ایسر کینہ۔ اوپارے کہ اقتصادی راہداری ٹی گلگت بلتستان نا بھاز اہم ءُ ہند اسے، ننا حکومت گلگت اٹی خصوصی اقتصادی زون نا جوڑ کننگ کن گام گیج کرینے، شاہراہ قراقرم نا اپ گریڈیشن نا منظوری ءِ تننگانے۔ شندور و چترال شاہراہ ئسک ہم سی پیک نا بشخ ءُ۔ بنجائی وزیر مراد سعید پارے کہ حکومت مفت درمان نا آسراتی نا پروگرام نا بناءِ کرے، گلگت بلتستان نا الس ءِ آئینی حق انا فراوانی کن عملی گام گیج کرینے۔ اوپارے کہ قومی دولت ءِ پلوک آ زموار آک سمجھرہ کہ الس اوفتے گیرام کرے۔ الس ءِ غٹ یات ءُ، پلوک آ دولت ءِ پدی تروئی مریک، ہرا دعویٰ کریرہ کہ اوفتا ہچ ءُ جائیداد اس اف، اوفتا ملک اٹی ارب آتا جائیداد آک ءُ۔ بنجائی وزیر پارے کہ الس نا کمک اٹ پی ٹی آئی گلگت بلتستان اٹی ہم حکومت کیک۔ اوپارے کہ وزیراعظم عمران خان اقوام متحدہ ٹی امت مسلمہ ناحقی وڑاٹ ترجمانی ءِ کرے، مستین اٹ دانا ہچ ءُ درور اس ملیپک۔ اوپارے کہ پاکستانی قوم ءِ داہیت آ گمر ءِ کہ وزیراعظم اقوام متحدہ نا سلامتی کونسل نا دیوان اٹی ایاک نعبد و ایاک نستعین نا توار ءِ بڑز کرے۔ اوپارے کہ گلگت بلتستان نا الس ءِ آئینی حق انا فراوانی نا بناءِ کرینے و گلگت بلتستان نا الس ہم 15 نومبر آ تینا حق انا پاسبان تحریک انصاف ءِ ضرور سرسہب کیرہ۔ داوخت آ گلگت بلتستان نا گچین کاری تیٹی بشخ ہلوک آ اومیت دار آتیان بیدس علاقہ نا شرفمند آتا بھلو کچ اس ہم ساڑی ئسر۔ جلسہ ٹی بشخ ہلوک آک نعرہ غاتا کمک اٹ بنجائی وزیر ءِ بخیر کریر۔ داکان مست بنجائی وزیر امور کشمیر و گلگت بلتستان علی امین گنڈاپور ہم السی جلسہ آن تران کرے۔
