اسلام آباد۔ 09 نومبر (اے پی پی) نیشنل کمانڈ اینڈ آپریشن سینٹر(این سی او سی) نا دیوان اٹی فورم اٹی کوویڈ۔ 19 نا مثبت کیس آتیٹی ساڑی آ ودکی و این سی سی دیوان آن پد ایس او پی تا ساڑی آ نافذ کروک آ گام گیج آتیا گپ وتران کننگا۔ صوبہ غاتا چیف سیکرٹریک تینا تینا صوبہ غاتیٹی زیات مثبت کیس آتا تناسب والا شار تیٹی ایس او پی تیا انتظامی گام گیج و خاص کر ماسک بیننگ نا چرجوئی ٹی انتظامی گام گیج و نافذ کننگ نا کوشست و اوپن ایئر اٹی برام تا وڑوڈول نا بست وبند آتا بارواٹی پاننگا۔فورم داڑآ سجفے کہ بھلا شار تیٹی کورونا مثبت کیس آتا تناسب ترندی اٹ ودنگ ءِ۔ ملک اٹی جم وڑاٹ 4.5 درسد مثبت کیس آتا تناسب ءِ۔ مچ آ پاکستان نا 15 بھلا شار تیٹی کورونا نا مثبت کیس آتا تناسب 16.59 درسد ءِ، گلگت اٹی 15.38 درسد، ملتان 15.97درسد، مظفر آباد 14.12 درسد، میرپور 11.11درسد، پشاور 9.69 درسد، کوئٹہ 8.03 درسد، اسلام آباد 7.48 درسد، کراچی 7.12درسد، لاہور5.37 درسد، و راولپنڈی 4.63 درسد ءِ۔ فورم ءِ پاننگاکہ 4 ہزار 136 مائیکرو لاک ڈاؤن مچ آ پاکستان اٹی خلنگانے۔ ٹی ٹی کیو نا حکمت عملی کورونا نا تالانی ءِ کنٹرول و توننگ کن کاریم اٹ اتنگ انگ ءِ۔ فورم ءِ پاننگاکہ جان جوڑی نا راہشون اصول 16 بھلا شار تیٹی 31 جنوری 2021 اسکان نافذ العمل مریک۔ فورم ءِ داڑآن معلومدار کننگاکہ 2 ہزار 811 آکسیجن نا آسراتی والا کٹ آتے ہسپتال آتیٹی گنجائشت و ودکی کن اوار کننگا۔ جتا صوبہ/بنجائی اکائی تے 13 ہزار آن زیات آکسیجن سلنڈر جاری کننگا۔ این سی او سی الس نا رکھ و راجی آسراتی کن جان جوڑی نا راہشون اصول آتارداٹ دمدستی و المی گام گیج کننگ کن صوبہ غاتا کوشست آتا ستاءِ کرے۔
