لاہور۔ 09 نومبر (اے پی پی) احتساب عدالت اٹ شہباز شریف و خاہوت نا برخلاف وعدہ معاف گواہ مروک آ مشتاق چینی بیان ترسا پارینے کہ شہباز شریف نا خاہوت کن کروڑ آ روپئی نا منی لانڈرنگ کرے، مون انگا دھن ءِ پیہن کرے، قاسم قیوم و عبدالقیوم کنا اکاؤنٹ آن 6 کروڑ نا ٹی ٹیز خلفے، وڑوڈول دا ئس کہ ای قاسم قیوم ءِ نغد 6 کروڑ روپئی تسٹ، قاسم قیوم ہمو ٹی ٹیز آتے خلفے و دا ظاہر کرے کہ دا پیسہ غاک کنے پیشن نا ملک آک ملانو۔ مشتاق چینی نا پاننگ ءِ کہ 2014 ء ٹی کنے سلمان شہباز نا مون انگا دھن ءِ پیہن کننگ کن کاریم اٹ اتنگا و پاننگاکہ کہ سلمان شہباز نا 60 کروڑ ءِ بلیک آن وائٹ منی ٹی گدریفنگ نا ءِ، ای بیوسی نا درشانی ءِ کریٹ تو پاننگابیرہ نا اکاؤنٹ استعمال مریک، متکن آ کاروباری تعلقداری و لالچ اٹ برسا ای موکل تسٹ۔ بیان اٹی پاننگاکہ 2014ء ٹی نجی بینک انا سرکلر روڈ برانچ آن 21 کروڑ 40 لکھ انا ٹی ٹیز خلفنگا، ہندا سال ولدا مشتاق اینڈ کمپنی نا اکاؤنٹ آن 29 کروڑ 30 لکھ انا ٹی ٹیز خلنگا، دا زر انا بریبر چیک ءِ ای کاٹ کرسا محمد عثمان نا دوٹی تسٹ، وقار ٹریڈنگ کمپنی آن کنا اکاؤنٹ اٹی 10 کروڑ گدریفنگا۔ دا زر انا بریبر نا چیک اس ای محمد عثمان نا دوٹی تسٹ۔ سلمان شہباز دا مچ آ ٹرانزیکشن نا فرضی معاہدہ ءِ تیار کرفے، معاہدہ آتا رداٹ 60 کروڑ نا زر اٹی سلمان شہباز آن بطور وام ہلکٹ، فرضی وام تے حقیقت نا رنگ اس تننگ کن سلمان شہباز 10 کروڑ کنا اکاؤنٹ اٹی گدریفیسس، ای مچ آ عمل ءِ کاروباری و مون انگا دھن ءِ پیہن کننگ نا لالچ اٹ کریٹ، ای تینا عمل آ نادم اُٹ و بشخنداری خواوہ۔ احتساب عدالت بیان تا کاپی تے شہباز شریف، حمزہ شہبازتون اوار ایلوفتے فراوان کرینے۔ داکان بیدس احتساب عدالت اٹی منی لانڈرنگ کیس اٹی دزگیر شہباز شریف و اونا مار حمزہ شہباز نا کنڈآن جیل اٹ میڈیکل آسراتی و جیل آن اتوک آ گاڈی نا بدلی نا برخلاف دائر درخواست آ عدالت نا پرمان آ سیکرٹری داخلہ پنجاب و جیل سپرنٹنڈنٹ نا کنڈآن دوشنبے نادے آ احتساب عدالت نا ایڈمن جج جواد الحسن نا روبرو رپورٹ ءِ جمع کرفنگا ہراٹی عدالت ءِ پاننگانے کہ دوبہ دار ءِ کانود نا رداٹ عدالت اٹ پیش کننگک، دوبہ دار ءِ عدالت اٹ پیش کننگ نا زمواری جوڈیشل آفیسر آتا سپرد ءِ، رپورٹ اٹی موقف اختیار کننگاکہ دوبہ دار آتا سیکورٹی نا رداٹ بکتر بند گاڈی ءِ گچین کننگک، رپورٹ اٹی عدالت ءِ معلومدار کننگاکہ شہباز شریف و حمزہ شہباز ءِ جیل اٹ جوان میڈیکل آسراتی فراوان کننگ انگ ءِ۔ منی لانڈرنگ و کٹیا غان زیات میرات ریفرنس کیس انا سماعت پگہ چارشنبے نادے آ مریک۔ جوڈیشل ریمانڈ چٹنگ آ شہباز شریف و حمزہ شہباز ءِ جیل آن اتسا عدالت اٹ پیش کننگک۔ عدالت کڑدہ غاتا وکیل آتے شرہ کن نوٹس جاری کرے۔
