کوئٹہ۔ 09 نومبر (اے پی پی) گورنر بلوچستان امان اللہ خان یاسین زئی علامہ اقبال نا ودی دے انا وخت آ پارینے کہ دا وخت ننے ہمو نظریہ غاتا یات ترفک ہرافتا پرچار ءِ علامہ اقبال تینا ولولہ انگیز شاعری و فکر انا کمک اٹ تینا غٹ زند ءِ اسلام و مسلمان تا گچینی و شونداری کن کرسا کرے۔ او مدام مچ آ دنیا نا مسلمان تا سیوت، یکجہتی و اوفتا عظمت رفتہ نا بحالی کن بھلو جوزہ اسے اٹ کاریم کرسا کرے۔ گورنر یاسین زئی پارے کہ اونا فکر انگیز شاعری نئے بیرہ برصغیر نا مسلمان تے ڈیوالئی نا تغ آن بش کرے بلکن ایلو ملک آتیٹی رہینگوک آ مسلمان تیا ہم اونا اثر مس۔ اوپارے کہ حقیقت تو دادے کہ امت مسلمہ نا سیوت کن اونا کلہو اینو ہم دعوت عمل و راہشونی فراوان کیک۔ داوخت آ نن دا ہیت انا درشاننی ءِ کین کہ نن نئے بیرہ اونا کلہو ءِ پہہ مرین بلکن اوڑآ عمل ہم کین۔ اودعا کرے کہ اللہ تعالیٰ ننے ہمت و طاقت ایتے کہ علامہ اقبال نا کلہو آ سہی وڑاٹ عمل کننگ کین۔
