پشاور۔ 08 نومبر (اے پی پی) اسپیکر قومی اسمبلی اسد قیصر پارینے کہ وزیراعظم عمران خان ریاست مدینہ نا حقی تصور ءِ پیش کرسا پنچ می جماعت آن ہلیس نہہ می جماعت اسکان تعلیمی نصاب اٹی خواجہ محمد صلی اللہ علیہ و آلہ وسلم نا سیرت ءِ اوار کننگ نا پارت کرینے، حکومت اٹی ہمو غٹ گام گیج آتے کننگ انگ ءِ ہرافتے مستین اٹ نام نہاد دینی جماعت آتا دور اقتدار اٹی کننگتنے، سود انا برخلاف کانود پاس کننگ و مسیت آتیٹی سولر سسٹم خلنگ ہم پاکستان تحریک انصاف حکومت نا مرہون منت ءِ، ساڑی حکومت پاکستان نا تاریخ نا اسٹ انگا حکومت ءِ ہرا پسماندہ تپہ ءِ بڑز اتنگ کن گام گیج کننگ ءِ۔ داخیال آتا درشانی ءِ او یک شنبے نادے آ یونین کونسل بٹاکاراضلع صوابی ٹی گورنمنٹ پرائمری اسکول و پیہور ہاملیٹ روڈ انا بنائی دود آن تران کرسا کرے۔ اسد قیصر پارے کہ عمران خان پاکستان نا تاریخ نا ہم ہمو اسٹ انگا لیڈر ءِ ہرا اقوام متحدہ ٹی خواجہ محمد صلی اللہ علیہ و آلہ وسلم نا شان اٹی گستاخی کروک آتابرخلاف ہم توار بڑز کرے و پارے کہ آجوئی سلاہ درشانی نا پن آ مسلمان تا جوزہ غاتے مجروح کرسا ننا است آتے ہسون کننگپ۔ خواجہ محمد صلی اللہ علیہ و آلہ وسلم تون مہرومریبت کننگ ننا ایمان نا جز ءِ۔ اوپارے کہ سرور کونین خواجہ محمد صلی اللہ علیہ و آلہ وسلم نا اسہ پژہ نا بدلہ دنیا جہان و مال و دولت ءِ ہم خس وخشاک سمجھنہ، خواجہ محمد صلی اللہ علیہ و آلہ وسلم نا شان اٹی گستاخی ءِ اسُل سگپنہ۔
