اسلام آباد۔ 08 نومبر (اے پی پی) وزیراعظم نا خصوصی کمکار موسمیاتی بدلی ملک امین اسلم پارینے کہ سموگ اٹی ودکی نا سوب مروک آ ذریعہ غاتا مون ءِ توننگ ہی اونا جان جوڑی و چاگڑد آ منفی زہم آتا توننگ کن گچین پک مریک۔ تینا اسہ بیان اسے ٹی او پیدواری کرے کہ جہانی ادارہ جان جوڑی نا رداٹ اوزون، کاربن مونوآکسائیڈ، سلفر آکسائیڈ، نائٹروجن آکسائیڈ و سیسہ کون آ عنصر آک چاگڑدی کچٹی نا اہم سوب آتیٹی شمار مریرہ۔ وخت اس کہ ننا ملک اٹی دا عنصر آک برنج نا فصل انا باقیات آتے ہُشنگ، روایتی خشت آتا بھٹہ غاتیٹی بے آب اٹنگا ایندھن نا کاریم اٹ اتنگ، ٹھوس فضلہ غاتا ہُشنگ، ہیبدار و فرسودہ ذرائع ہن و بر و فیکٹری تیٹی نسخان دہ گڑاتا کاریم اٹ اتنگ آن چاگڑد اٹی اوار مرسا ملک انا چندی بشخ خاص کر قطبی پنجاب اٹی سموگ ودی مننگ و اونا ودنگ نا سوب مننگ ءُ ہرا الس نا جان جوڑی و چاگڑد ءِ نسخان تننگ ءُ۔ سموگ تہواٹی ساڑی کچٹ گڑاتا مرکب آ تالان موڷ مریک۔ہراڑآن انسانی جان جوڑی و چاگڑد ءِ بھاز خطرہ مون تروک ءِ۔ ملک امین اسلم پارے کہ انسانی جان جوڑی نا چندی ویل دُن کہ دمہ، الرجی، برانکائٹس، پھیپڑہ غاتیٹی انفیکشن، جکہ، خن تا ہُشنگ انگ، سینہ، بامس و لخ انا انفیکشن وخت اس کہ چندی کینسر سموگ نا اثرآتا سوب آن لاحق مننگ کیک۔ سموگ نا اثرآتیان رکھ مننگ نا بابت آگاہی و شعور نا گرج آ زور شاغسا ملک امین اسلم پروسیڈنگز آف نیشنل اکیڈمی آف سائنسز نا 2018ء ٹی شینک مروک آ جریدہ نا رداٹ کروک آ پٹ وپول نا رواٹ پارے کہ چاگڑدی کچٹی آن ذہانت اثراندازمریک۔ اوپارے کہ چاگڑدی کچٹی الس اٹ ہائپر ٹینشن و غیر معاشرتی رویہ نا ہم سوب مریک، داکان بیدس غصہ ہم ہندا کچٹی آن مربوط کننگک۔ ولے خصوصی کمکار تنبیہ کرے کہ اگہ سموگ نا ویل و داڑآن ودی مروک آ انسانی جان جوڑی، چاگڑد و زرگزرانی مشکل آتا جاچ ءِ ہلسا اوفتے وخت آ ایسر کننگتو تو سنگین نتیجہ غاتون مون تروئی تمک۔
