سکردو۔ 08 نومبر (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ وزیراعظم عمران خان نا آصف زرداری و نواز شریف تون ہچ ءُ جنگ اس اف، او الس کن جنگ تننگ ءِ۔ نجی ٹی وی چینل نا رداٹ سکردو ٹی لس جلسہ غان تران کرسا اوپارے کہ وونٹ نما پنچ سال انا شونداری نا فیصلہ ءِ کیک، عمران خان نما 72 سال انا محرومی تے مُر کرسا عبوری صوبہ نا پڑو ءِ کرینے۔ وزیراعظم عمران خان لس بندغ نا ویل آتے سمجھک۔ عمران خان نیزگار الس نا راجی آسراتی کن کوشست کننگ ءِ۔ اوپارے کہ نن خیبر پختونخوا ٹی قرآن پاک نا تعلیم ءِ المی گوندان، خیبرپختونخوا نا حکومت اٹی عمران خان لب انا لعنت ءِ چٹفے، خیبرپختونخوا حکومت جان جوڑی انصاف کارڈ صوبہ نا ہر خاہوت ءِ تس، نمے اسہ عظیم ءُ لیڈر اس رسینگانے داسہ فیصلہ نمے کروئی ءِ۔ صدارتی گچین کاری تیٹی امریکی الس اومیت، سیوت و شائستگی ءِ گچین کریر۔ علی امین گنڈاپور پارے کہ زرداری اسہ سینما سے نا خواجہ ئس، پیسہ غاتے پُلسا ارب آتا خواجہ جوڑ مس، اوتینا چناتیکن کھرب آ روپئی نا ماڑی جوڑ کرے۔ بنجائی وزیر پارے کہ مولانا فضل الرحمان ءِ اونا تینا مخلوق مسترد کرے، پی ڈی ایم فوج و ادارہ غاتا برخلاف ءِ، ہرا فوج و ادارہ غاتا وفادار اف او پاکستان نا وفادار اف ہرانا قربانی تے بھارت نا سنگتی ٹی زیان کننگ نا موکل تفنہ۔ کرپشن اٹ پیسہ غاتے پُلسا بلاول بھٹو و مریم نواز نا اکاؤنٹ اٹی کھرب آ روپئی شاغنگانے۔
