سوشل میڈیا نئے بیرہ انٹرٹینمنٹ نا ذریعہ ءِ بلکن علم و معلومداری اسکان رسینگ نا وسیلہ ہم ارے، گورنر بلوچستان امان اللہ خان یاسین زئی

کوئٹہ۔ 05 نومبر (اے پی پی) گورنر بلوچستان امان اللہ خان یاسین زئی پارینے کہ ڈیجیٹل انفارمیشن ٹیکنالوجی نا دا پوسکن آ دور اٹی سوشل میڈیا تینا اہمیت و فائدہ غاتا بنداو آ ہڑدے ئی زند انا المی جز مسنے۔ سوشل میڈیا نئے بیرہ انٹرٹینمنٹ نا ذریعہ ءِ بلکن علم و معلومداری اسکان رسینگ نا وسیلہ ہم ارے۔ گورنر یاسین زئی غٹ میڈیا پرسنز خاص کر سوشل میڈیا ایکٹیویسٹس آ زور شاغا کہ بلوچستان نا مثبت و شون پسندانہ تاثر ءِ زیات آن زیات تالان کیر۔ داہیت ءِ او پنچ شنبے نادے آ گورنر ہاؤس کوئٹہ ٹی سوشل میڈیا نا ایکٹیویسٹس تون گپ وتران کرسا پارے۔ داوخت آ گورنر بلوچستان پارے کہ بلوچستان اٹی آباد قومک شاندار قدر و روایت آتا امین ءُ۔ ننا ورناک اودیم لائخی تیان معمور ءُ ہنداخاطرآن المی ءِ اوفتا اودیم لائخی تیٹی نکھار ودی کننگ کن جوان وارخواہی و المی آسراتی فراوان کننگے۔ گورنر صوبہ نا باصلاحیت فنکار، موسیقار و گلوکار آتا زرگزرانی نا آسودگی نا چٹفنگ و اوفتا فن انا شون و پذیرائی آ چکار کننگ نا گرج آ ہم زور شاغا۔ اوکان پد کوئٹہ سوشل میڈیا ایکٹیویسٹس ءِ گورنر ہاؤس نا چندی بشخ ءِ نشان تس و سوشل میڈیا ایکٹیویسٹ آک دافتے ٹی خاصی است خواہی ظاہر کریر۔