مچ آ دنیا ٹی کورونا دین آن 45 ملین آن زیات بندغ زہمی مسر، لکھ آ بندغ آتا جانک زیان مسر، بنجائی وزیر انسانی حق ڈاکٹر شیریں مزاری نا شش می استنبول سیکورٹی کونسل آن ویڈیو لنک انا کمک اٹ تران

اسلام آباد۔ 05 نومبر (اے پی پی) بنجائی وزیر انسانی حق ڈاکٹر شیریں مزاری پارینے کہ مچ آ دنیا ٹی کورونا دین آن 45 ملین آن زیات بندغ زہمی مسنو و لکھ آ جانک زیان مسنو، کورونا دین انا ارٹ میکو لہر بناکرینے، دا دین جہانی زرگزران، الس و قوم تا زند ءِ ہڑدے ئی بنداو آزہمی کرے۔ وزیراعظم عمران خان اسلاموفوبیا نا برخلاف توار بڑز کننگ کن مسلم ملک آتا راہشون آتے چھٹی نوشتہ کرے۔ داہیت ءِ او پنچ شنبے نادے آ شش می استنبول سیکورٹی کانفرنس آن ویڈیو لنک انا کمک اٹ تران کرسا پارے۔ ڈاکٹر شیریں مزاری ترکی نا شار ازمیر اٹی زمی جمب انا سوب جانی و مالی نسخان آ است ہسونی نا درشانی ءِ کرے و پاکستان نا الس و حکومت نا کنڈآن ہروڑنا کمک نا سلہ خلک۔ اوپارے کہ نن گیرام کتنن کہ ترکی نا حکومت و الس پاکستان اٹی 2005ء نا زمی جمب اٹی پاکستان نا الس و حکومت تون یکجہتی نا درشانیءِ کریر و ہر لحاظ اٹ کمک فراوان کریر۔ اوپارے کہ دنیا کورونا دین اٹی اختہ ءِ، داتم اسکان مچ آ دنیا ٹی 45 ملین آن زیات بندغ دا دین انا گواچی مسنو و لکھ آ بندغ آتا جان زیان مسنے۔ اوپارے کہ مچ آ دنیا ٹی کورونا دین انا ارٹ میکو لہر بناکرینے۔ دا دین آن جان جوڑی نا بارواٹی کافی گڑتی ءِ۔ دا جہانی زرگزران، بندغ و قوم تا ہڑدے ئی زند ءِ زہمی کرینے، کثیر الجہتی کوشست آتیان دا دین آن ودی مروک آ ویل آتیٹی کمک ملوئی ئس۔ دا دین ننے دا رغامانے کہ اسہ بندغ اس ہم ہمووخت اسکان رکھ مننگ کپک ہراتم اسکان غٹ بندغ آک دا دین آن رکھ مفس۔ اوپارے کہ غٹ بندغ آتے دادین آن رکھ تخنگ اسہ بھلو چیلنج اسے۔ ہراتم دا تنکی بس تو ہر ملک تینے دا دین آن بچفنگ نا کوشست کننگ اٹ لگا۔ دا مشکل وخت اٹی اختلاف آتے اسہ کنڈ تخسا بھاز انگا ملک آک امتیازی سلوک، نسل پرستی و ایلو نزور رڑتا برخلاف تشدد آمیز رویہ اختیار کریر۔ اوپارے کہ دادین جہانی امن و سیکورٹی ءِ ہم گڑتی تیان دوچار کرینے۔ شیریں مزاری پارے کہ کورونا دین آن بیدس ہم کیہی چیلنج آک اریر، قوم پرستی، اسلاموفوبیا و جارحیت ءِ مون آ دننگا، اسلاموفوبیا تون اوار مسلمان تا برخلاف تعصب، امتیازی سلوک و انتہاپسندانہ رجحان ہم ودا، اسلامی و مقدس ہند آتے بھس کننگ انگ ءِ۔ اوپارے کہ ننا نبی اکرم صلی اللہ علیہ و آلہ وسلم نا توہین ءِ کننگ انگ ءِ، آجوئی سلاہ درشانی نا پن آ قرآن پاک ءِ نذرآتش کننگ نا واقعہ غاک رونما مسر۔ اوپارے کہ دیکی ریاست خاص کر یورپی یونین نا نامناسب رویہ ءِ گوجالنگ مفک۔ وزیراعظم عمران خان اقوام متحدہ نا جنرل اسمبلی آن خواست کرے کہ او اسلاموفوبیا تون مون تننگ کن جہانی دے انا پڑو ءِ کے۔ وزیراعظم عمران خان مسلم ریاست آتا راہشون تے چھٹی ہم نوشتہ کرے کہ او خار و انتہاپسندی نا چٹفنگ کن اجتماعی وڑاٹ مون آ بریر و اسلاموفوبیا نا برخلاف توار بڑزکیر۔