پاکستان انسانی ٹریفکنگ و اسمگلنگ نا توننگ کن گچین گام گیج کرے، وزیر داخلہ بریگیڈیئر (ر) اعجاز احمد شاہ نا بوسنیا نا وزیر سیکورٹی تون اوڑدہی ٹی گپ وتران

اسلام آباد۔ 05 نومبر (اے پی پی) وزیر داخلہ بریگیڈیئر (ر) اعجاز احمد شاہ پارینے کہ پاکستان انسانی ٹریفکنگ و اسمگلنگ نا توننگ کن گچین گام گیج کرے، پاکستان دا گندہ انگا ڈوہ ءِ توننگ کن کوسٹ گارڈ و ایف سی نا چیک پوسٹ جوڑ کرینے۔ اودیم معلومداری آ مبنی آپریشن ہم کننگا، پاکستان غیر کانودی پردیسی تا باندات آن پورو وڑاٹ معلومدار ءِ۔ داخیال آتا درشانی ءِ او بوسنیا نا وزیر سیکورٹی تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی وزیر داخلہ پارے کہ پاکستان انسانی ٹریفکنگ و اسمگلنگ نا توننگ کن گچین گام گیج کرے۔ پاکستان نا گام گیج آتا سوب انسانی ٹریفکنگ و اسمگلنگ اٹ پیدوار کمتی بس۔ اوپارے کہ پاکستان دا گندہ انگا ڈوہ ءِ توننگ کن کوسٹ گارڈ و ایف سی نا پوسکن ءُ چیک پوسٹ جوڑ کرینے۔ انٹیلی جنس معلومداری آ مبنی آپریشن ہم کننگا۔ اوپارے کہ پاکستان غیر کانودی پردیسی تا باندات آن پورو وڑاٹ معلومدار ءِ۔ غیر کانودی پردیسیک ملک اکن بدنامی نا سوب مریرہ۔ وزیر داخلہ اعجاز شاہ پارے کہ زیات تر مخلوق گچین زرگزرانی وارخواہی تا پٹنگ اٹ داکاریم اٹ اوار مریرہ ۔ وزیراعظم نا کنڈآن تعمیرات نا صنعت کن گام گیج آتا سوب ملک اٹی روزگارناوارخواہی پین ودنگ ءِ۔ داٹی غیر کانودی پردیسیک تینا مرضی اٹ پیشن نا ملک آتیان پدی بریرہ۔ داوخت آ بوسنیا نا وزیر سیکورٹی پارے کہ پاکستان تون غیر کانودی پردیسی تا بارواٹی معاہدہ تعلقداری ءِ زیات سوگو کیک۔ پاکستان تہہ و پیشن نا چیلنج آتون سرسہبی اٹ مون تس۔ اوپارے کہ نن پاکستان نا گچین انٹیلی جنس ، پولیس و سیمی بست و بند آتیان ہیل کننگ خوانہ۔